SEKOOP anúnsia Fundu Subvensaun Públika ba públiku atu aplika
DILI, 27 janeiru 2025 (TATOLI)—Sekretaria Estadu Kooperativa (SEKOOP), segunda ne’e, anúnsia ba interesadu sira ne’ebé hakarak aplika ba Fundu Subvensaun Públika 2025.
“Ami halo konferénsia imprensa ida-ne’e atu hato’o ba públiku katak interesadu sira ne’ebé mak hakarak aplika ba Fundu Subvensaun Públika, bainhira anúnsia ona publikamente bele bá aplika,” Sekretáriu Estadu Kooperativa, Arsénio Pereira da Silva dehan bainhira hala’o konferénsia imprensa iha nia kna’ar fatin, Akait, Dili.
Nia esplika, objetivu husi Fundu Subvensaun Públika ne’e atu diversifika ekonomia no kriasaun empregu ne’ebé sai hanesan polítika nasionál IX Governu Konstitusionál, nune’e investe iha área fundamentál sira hanesan kapitál sosiál, dezenvolvimentu infraestrutura no dezenvolvimentu ekonómiku bazeia ba kuadru institusionál ida-ne’ebé efikás no transparente tuir prinsípiu no valór boa-governasaun ne’ebé Governu opta.
Aleinde ne’e, responsável Komisaun Subvesaun Públika husi SEKOOP, Marta de Araújo, hateten iha planu asaun anuál no planu orsamentu SEKOOP tinan 2025 ne’ebé aprova ona iha Parlamentu Nasionál define estratéjia ba polu dezenvolvimentu kooperativa iha área rurál ho objetivu atu hadi’a ekonomia família nu’udar ai-riin ba dezenvolvimentu ekonomia nasionál.
“Baze fundamentu ne’ebé sita liubá, Sekretaria Estadu Kooperativa re-inventa polítika nasionál IX Govenu Konstitusionál hodi aborda nia planu estratéjiku SEKOOP ba tinan 2023 to’o 2028 ho vizaun ida katak harii sosiedade ida justa, próspera no sustentavál,” Marta informa.
Baze ba programa nasionál Governu, nia esklarese, planu estratéjiku SEKOOP no planu asaun anuál ne’ebé estipula iha leten, nu’udár razaun fundamentu ba SEKOOP atu kontinua manifesta kompromisu polítiku IX Governu Konstitusionál, konforme Dekretu-Lei Nú. 79/2023, 11 fulan-outubru haktuir katak SEKOOP koordena ho departamentu govermentál sira ne’ebé relevante hodi promove dezenvolvimentu Kooperativa, mikro no industria ki’ik sira iha área rurál.
“Konsidera Dekretu-Lei Nú. 39/2024, 27 fulan Novembru, kona-ba regulamentu subsídiu, subvensaun no doasaun públika, ne’ebé hateten katak ezekusaun orsamentu subvensaun públika tenke iha transparénsia no publisidade,” nia haklaken.
Sekretaria Estadu Kooperativa anúnsia ba públiku iha média sosiál partikularmente iha pájina Facebook SEKOOP hodi hatuur kritériu legál ba aplikasaun subvensaun públika ba tinan 2025, maibé infelizmente anúnsia/publisidade refere la asesível, ho nune’e, dala ida tan, liuhusi konferénsia imprensa, hakarak solisita ba entidade ekonomia sosiál grupu, asosiativizmu, fundasaun, kooperativizmu, karik interese, bele remete proposta mai gabinete SEKOOP, Akait Dili.
Interesadu sira mós bele haree kritériu aplikasaun proposta subvensaun públika iha pájina ofisiál SEKOOP ne’ebé publika ona iha 09 janeiru 2025.
Jornalista : Felicidade Ximenes
Editór: Xisto Freitas da Piedade
