DILI, 28 janeiru 2025 (TATOLI)—Diresaun Nasionál Veterinária Ministériu Agrikultura, Pekuária, Peska no Floresta (MAFFP), iha 2024 vasina ona animál hamutuk 213.079 iha munisípiu Dili, Covalima, Ataúro no Rejiaun Administrativa Espesiál Oé-Cusse Ambeno (RAEOA).
Diretora Veterinária Nasionál MAFFP, Joanita Jong relata, tipu animál ne’ebé hetan ona vasinasaun mak hanesan asu, busa no lekirauk hamutuk 51.751, karau hamutuk 17.662 no manu hamutuk 143.666.
“Iha tinan kotuk ami konsege fó vasinasaun ba animál sira ne’ebé iha luhan. Ami haree liubá karau, liuliu iha luhan inklui ho animál sira seluk,” Joanita Jong, ba Tatoli, iha Comoro, Dili, tersa ne’e.
Tuir diretora ne’e, manu hetan vasinasaun tinan ida dala tolu no animál sira seluk tinan ida dala ida hodi prevene infesaun moras.
Joanita Jong mós haktuir katak iha 2024, sira rejistu fahi ne’ebé mate hamutuk 500 hosi populasaun iha Dotik-Manufahi.
“Ami hakarak kontinua sensibiliza populasaun sira kona-ba moras fahi Afrikana, inklui moras sira seluk ne’ebé karau sira enfrenta,” nia informa.
Responsável ne’e husu ba populasaun atu kontinua kria luhan ba fahi sira no labele fó hahán restu ba fahi sira no animál sira ne’ebé importadu.
Entretantu, ba manu uza vasina Newcastle Disease, karau uza Septicemia Epizootica, asu, busa no lekirauk uza vasina Raiva.
Jornalista: Felicidade Ximenes
Editór: Xisto Freitas da Piedade
