BAUCAU, 30 Janeiru 2025 (TATOLI) – Kámara Komérsiu Indústria Timor-Leste (CCI-TL, sigla Portugés) munisípiu Baucau preparadu simu implementasaun podér lokál no desentralizasaun administrativa.
Vise-Prezidente CCI-TL Baucau, Estanislau Maria Quintas da Costa, hateten polítika Ezekutivu nian ba implementasaun podér lokál ne’e importante, tanba hakbesik Governu sentrál mai povu, liuliu ba setór privadu iha Baucau.
“Hanesan setór privadu, ha’u bele dehan ita preparadu ona, tanba sempre iha planu ba implementasaun politika podér lokál”, Estanislau dehan ba Tatoli, iha Vila Antiga, ohin.
Nia akresenta katak setór privadu iha Baucau sempre hasoru difikuldade, liuliu liga ba prosesu burokrasia, tanba kontinua sentraliza iha nasionál ne’ebé fó impaktu ba efetividade tempu. CCI-TL Baucau iha planu ba investimentu sira, liuliu iha setór agrikultura no turizmu ne’ebé konsideradu sustentavel, nune’e bele hasa’e ekonomia komunidade, bainhira realiza podér lokál no desentralizasaun administrativa.
“Agrikultura no turizmu iha Baucau iha poténsia, nune’e setór privadu sempre preparadu”, Estanislau reitera.
CCI-TL kontinua serbisu hamutuk ho parte autoridade lokál, sivíl, militár, veteranu no igreja, liuliu oinsá halo koordenasaun serbisu hodi prepara aan di’ak liután bainhira podér lokál ne’e implementa.
Nia mós rekomenda ba Governu sentrál atu kria lei ne’ebé forte ba ezisténsia CCI-TL, aleinde sai mahon ba setór privadu sira, futuru bele iha kompeténsia hodi difine polítika ekonomia iha Timor-Leste.
Tuir planu, Governu sentrál liuhusi Ministériu Administrasaun Estatál sei aprezenta kalendáriu hodi hetan aprovasaun iha reuniaun Konsellu Ministru (KM), nune’e futuru bele ona aplika lei tolu kona-ba polítika autonomia administrativa iha kada munisípiu.
Lei tolu ne’ebé mensionadu bazeia ba Konstitusaun Republika Demokratika Timor-Leste (KRDTL) iha artigu 72 hateten establesimentu poder lokál ne’e loke dalan ba kriasaun lei númeru 23/2023, loron 10 Novembru, ne’ebé regulariza implementasaun podér lokál no desentralizasaun administrativa.
Lei númeru 16/2023, loron 31 Maiu, kona-ba Finansa Munisipál, ne’ebé regulariza maneira hotu utilizasaun orsamentu no lei númeru 22/2021, loron 4 Novembru, kona-ba Eleisaun Munisipál, ne’ebé sei regulariza mekanizmu eleisaun ba membru asembleia no Prezidente Autóridade Munisipál.
Notísia relevante: MAE kontinua avalia kondisaun mínima molok implementa podér lokál iha Baucau
Jornalista: Natalino Belo
Editora: Maria Auxiliadora
