iklan

EDUKASAUN, BAUKAU, HEADLINE, MUNISÍPIU

CDC Baucau abertu formasaun agrikultura iha fulan ne’e

CDC Baucau abertu formasaun agrikultura iha fulan ne’e

Diretór CDC Baucau, Vicente Matos Belo, aprezenta mákina produsaun nuu iha sentru formasaun Triloka, segunda (03/02/2025). Imajen Tatoli/Natalino Belo

BAUCAU, 03 fevereiru 2025 (TATOLI)—Sentru Dezenvolvimentu Komunitáriu (CDC-sigla portugés), sei halo abertura ba formasaun tinan letivu 2025 iha inísiu fevereiru ne’e.

Diretór CDC Baucau, Vicente Matos Belo, esplika formasaun ne’e halai liubá agrikultura, ambientál no tuir planu sei abertu husi Sekretáriu Estadu Formasaun Profisionál no Empregu iha semana ne’e.

“Ita finaliza rejistrasaun no agora formandu sira hahú tama iha faze orientasaun inklui sei hein disponibilizasaun husi Sekretáriu Estadu Formasaun Profisionál no Empregu atu halo abertura,” Diretór CDC Baucau informa ba TATOLI iha Triloka, Baucau, segunda ne’e.

Sentru formasaun CDC Baucau tinan ne’e simu formandu agrikultura dahuluk hamutuk na’in-21 kompostu mane tolu no feto na’in-11, enkuantu na’in-hitu seluk sei maihusi suku Nahareca, postu administrativu Ossú, munisípiu Viqueque no sertifikadu daruak hamutuk na’in-14 kompostu mane na’in-rua no feto na’in-12 ne’ebé hela iha dormitóriu CDC Triloka nune’e hein tuir kursu durante fulan-neen.

Durante orientasaun, formandu sira sei rona esplikasaun jerál kona-ba CDC, lala’ok formasaun no matéria jerál kona-ba agrikultura nian.

Formandu na’in-35 referidu durante formasaun sei aprende matéria sira hanesan lian inglés, koñesimentu báziku matéria no instrumentu agrikultór, ambientál, komunikasaun, métodu viveiru fini, kuda, matéria numerásia, irrigasaun no pratika iha terenu.

“Ita mós fó matéria estra kona-ba prodús fini tomate, pakotamentu to’o fa’an iha loja,” Vicente Belo akresenta.

CDC Baucau garante katak bainhira formasaun ramata bele kria rasik kampu traballu no iha abilidade sai traballadór iha estranjeiru hanesan tuir rekrutamentu husi Sekretaria Estadu Formasaun Profisionál no Empregu (SEFOPE) relasiona ho programa auto-empregu iha Austrália.

Entretantu, durante sai sentru formasaun agrikultura iha Baucau, CDC prodús ona formandu na’in-300 ne’ebé maioria formandu pursentu 60 koresponde na’in-160 sai traballadór profisionál iha rai-laran, rai-li’ur  pursentu 10 mak kontinua estudu iha universidade no pursentu lima mak loke rasik kampu serbisu iha área agrikultura.

Jornalista: Natalino Belo

Editór: Xisto Freitas da Piedade

iklan
iklan

Leave a Reply

iklan
error: Content is protected !!