BAUCAU, 03 fevereiru 2025 (TATOLI)—Serbisu Munisipál Edukasaun (SME) Baucau, segunda ne’e, ofisialmente lansa programa merenda eskolár ba tinan 2025.
Diretór Serbisu Munisipál Edukasaun Baucau, Afonso dos Santos da Costa, esplika programa referidu sei benefísia estudante hamutuk 32.730, kada estudante sei gasta sentavu 0.42 iha loron ida ho tótal loron efetivu hamutuk 150 ne’ebé fahe ba pursentu 75 husi produtu lokál no pursentu 25 produtu importadu.
“Programa ne’e loloos ita implementa iha fulan janeiru, maibé tanba difikuldade iha prosesu administrasaun, entaun ohin mak halo lansamentu,” Diretór Edukasaun Baucau hateten iha eskola bázika filiál (EBF), Vila Nova, Baucau, segunda (03/02/2025).
Afonso salienta alokasaun orsamentu ba programa merenda eskolár finansia husi orsamentu Autoridade Administrasaun Munisipál hamutuk $261.990,00 ne’ebé transfere direta ba bankária eskola hamutuk 230 kompostu eskola pre-eskolár, ensinu báziku privadu no píbliku.
Iha fatin hanesan, Sekretária Munisipál Asuntu Sosiál, Maria Viegas, husu responsável programa merenda eskolár sira atu kumpre ijiene no garante oferese ai-han lokál nune’e bele benefísia agrikultór sira iha Baucau.
“Husu atu programa merenda eskolár ne’e tenke mai duni husi hahán lokál nian,” Maria Viegas hateten.
Nia orienta atu durante ezekusaun orsamentu merenda eskolár ba tinan ne’e ramata ho efetivu liután kompara ho tinan 2024, tanba objetivu dahuluk mak fó atensaun ba estudante sira relasiona ho konsume hahán nutritivu.
Entretantu, tuir livru matadalan programa merenda eskolár, kada semana fahe oráriu hanesan, hosi loron-segunda, estudante sira sei han etu, modo, na’an bifi, mostarda no hudi tasak, tersa han etu, manu-tolun, ai-farina tahan no ai-dila tasak.
Menu ba loron kuarta kompostu etu, modo koto mean, na’an karau no salada-fruta, kinta etu no na’an, modo raba-raba no sobremeza (es-buah), enkuantu iha loron-sesta menu etu, modo tempe, taho, fore-xikote no salada-fruta.
Jornalista: Natalino Belo
Editór: Xisto Freitas da Piedade
