iklan

BAUKAU, ELEISAUN, HEADLINE, MUNISÍPIU

STAE sei realiza reuniaun konsellu suku dahuluk ba suku foun iha Baucau

STAE sei realiza reuniaun konsellu suku dahuluk ba suku foun iha Baucau

Diretór STAE Munisípiu Baucau, Natividade Freitas Guterres. Imajen Agência TATOLI/Natalino Belo

BAUCAU, 03 fevereiru 2025 (TATOLI)—Sekretariadu Tékniku Administrasaun Eleitorál (STAE) Baucau, sei realiza reuniaun dahuluk ba suku foun tolu iha semana ne’e.

Diretór STAE Baucau, Natividade Freitas Guterres, esplika hafoin rezultadu eleisaun ba suku foun fó-sai, sei laiha volta daruak tanba kandidatura sira hosi suku tolu hetan votu liu barreira pursentu 50.

“Ami-nia serbisu hela ida de’it mak akompaña reuniaun konsellu suku hodi kompleta estrutura suku foun,” Diretór STAE Baucau informa ba TATOLI iha ninia kna’ar fatin, Vila Nova, Baucau, segunda ne’e.

Natividade Freitas salienta katak reuniaun konsellu suku ba dahuluk sei hala’o iha loron 5 fevereiru ne’ebé sei foku ba kompleta tan estrutura suku hanesan hili reprezentante xefe juventude mane no feto inklui lia-na’in, enkuantu xefe aldeia no delegadu/a eleitu ona iha eleisaun suku tinan 2024.

Notísia relevante: http://Kandidatu na’in tolu lidera suku foun tolu iha Baucau

Reuniaun Konsellu suku bazeia ba Dekretu Governu númeru: 5/2024 kona-ba loron realizasaun konsellu suku iha ámbitu prosedimentu eleisaun líder komunitária ne’ebé previstu iha ártigu 5 hateten katak loron reuniaun konsellu suku hodi hili lia-na’in no juventude feto no mane ne’ebé tuir aliña a husi artigu referida sei realiza iha loron 5 fevereiru 2025.

Nia esplika loron toma pose ba xefe suku sei realiza hamutuk ho xefe suku foun seluk hafoin finaliza tan eleisaun volta daruak ne’ebé tuir planu sei hala’o iha fulan ne’e.

Entretantu, kandidatu hitu kompete iha eleisaun ba líder suku foun tolu iha Baucau ne’ebé hala’o iha 25 janeiru liubá, kompostu husi Henrique Fernandes, João Quintas no Juvinal da Costa husi suku Builai. Caibada Makasae kompostu husi Geraldo da Costa, Juvinal Alegria Belo no Maria E. da Costa. Suku Ueru-Mata kandidatu úniku, Sabino Martins.

Husi suku Builai, kandidatu Juvinal da Costa mak eleitu ho pursentu 52.35 husi votu 523. Husi Caibada Makasae, kandidatu Júlio Alegria Belo mak eleitu ho pursentu 56.87 husi votu 596 no husi suku Ueru-Mata kandidatú úniku Sabino Martins mak eleitu ho votu 264.

Totál eleitór ba suku foun tolu ne’ebé realiza eleisaun hamutuk 3.596, ho totál taxa partisipasaun 2.361 kompostu husi votu válidu 2.311, votu nulu 42. Suku Builai totál votante 1.025 husi eleitór 1.630. Caibada Makasae totál votante 1.058 husi eleitór 1.605. Ueru-Mata totál eleitór 278 husi votante 361.

Suku Builai hamutuk aldeia haat hanesan Builai, Alala, Manulao no Samalaculiba. Suku Ueru-Mata iha aldeia ida mak Ueru-Mata. Caibada Makasae iha aldeia haat kompostu hosi Boru-baha, Caiobilale, Data-ua no Maulame

Estabelesementu suku foun iha Timor laran bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.

Jornalista: Natalino Belo

Editór: Xisto Freitas da Piedade

iklan
iklan

Leave a Reply

iklan
error: Content is protected !!