DILI, 03 fevereiru 2025 (TATOLI)—Ró kruzeiru Paul Gauguin ne’ebé tula turista hamutuk 350, atraka ona iha Portu Dili, segunda ne’e, tuku 09:00 Otl.
“Ró kruzeiru ne’e tula turista sira hamutuk 350 inklui ona crew sira,” Diretora Nasionál Marketing no Relasaun Internasionál iha Ministériu Turizmu no Ambiente, Ivánia Ros Ximenes Gonçalves, hateten ba jornalista sira, iha Portu Dili.
Nia haktuir, ró ne’e maihusi Illa Samaria, Papua Nova Guinea no sei atraka iha-ne’ebá to’o tuku 17:00 Otl, hafoin ne’e, sei aranka fali bá Illa Komodo.
“Loloos nia atraka ne’e iha tuku 07:00 dadeer maibé ita-nia tasi sei badak, entaun sira hein to’o kuaze tuku 09:00 Otl mak foin atraka no sira hala’o atividadae tarde uitoan tanba atrazu referidu,” nia tenik.
Ivánia informa katak turista sira-ne’e hala’o vizita bá fatin turístiku sira hanesan Maubara, Muzeu Rezisténsia, Centro Chega!, Rate Santa Cruz, Tais Market Colmera no tasi ibun Cristo Rei.
“Turista sira-ne’e maihusi nasaun Austrália, Xina, Papua Nova Guinea, França, Itália, España, América, Singapura no Fijí.
Tuir planu, iha fulan -abríl 2025, ró kruzeiru ida sei tula tan turista sira mai atraka iha Portu Dili.
Entretantu, antes ró tama mai Timor-Leste, fasilita husi ajénsia Lai-Ara no simu dansa tradisionál husi grupu Leziaval.
Antes ne’e, 22 janeiru 2025, ró kruzeiru ho naran Le Laperouse husi nasaun Fransa tula turista hamutuk 143, vizita Timor. Ró referidu tula turista sira mai vizita mós Muzeu Rezisténsia, Centro Chega!, Rate Santa Cruz, Tais Market no mós kooperativa kafé nian.
Turista hirak-ne’e hala’o vizita durante loron rua iha Timor. Loron dahuluk sira atraka iha Wataboo Beach Baucau depois sira fahe grupu hodi vizita ba fatin turizmu iha Baucau rasik no loron ikus vizita Dili.
Área turizmu sai setór importante hodi dada turista vizita Timor. Tanba ne’e, IX Governu Konstitusionál liuhusi nia kompromisu ho forma planeada no organizada sei dezenvolve estratéjia nasionál ida, lahó intensaun atu kompete ho turizmu Massi, Ikadu iha Sudeste Aziátiku, maibé bele kria sinerjia ho lokalidade sira seluk iha rejiaun ne’e, hanesan Flores, Molukas no Kúpaun, atubele kria no dezenvolve pakote turı́stiku ne’ebé dada vizitante sira hosi Indonézia, Austrália no hosi paı́s sira seluk iha Ázia no Pası́fiku.
Iha merkadu globál ida-ne’ebé buka oferta turı́stika ne’ebé foun no auténtika, Timor-Leste bele hatúr nia-an ho kompetitividade boot, liuliu iha rejiaun, haree ba nia diferensa. Maibé, nesesáriu atu dezenvolve estratéjia efikás ida ba atrasaun turı́stika, ne’ebé promosaun ho marketing sai fundamentál hodi hatudu kompetitividade ne’e. Iha abordajen dahuluk, sei investe iha promosaun ba tipu turizmu hanesan Turizmu Komunitáriu no Ekolójiku, Turizmu Aventura (inklui montanizmu (ka, sa’e foho), mergullu (ka, luku) no snorkeling ho tan desportu radikál seluk, Turizmu Relijiozu, Turizmu Istóriku, Kulturál no Etnográfiku, Turizmu Lazer no Balneár (ka hariis iha tasi no Turizmu Termál (iha fatin bee-manas).
Jornalista: Felicidade Ximenes
Editór: Xisto Freitas da Piedade