BAUCAU, 04 fevereiru 2025 (TATOLI)–Autoridade Administrasaun Munisipál (AAM) Baucau liuhosi Serbisu Munisipál Agrikultura Pekuária no Peska distribui fini hare hamutuk tonelada 10 ba postu administrativu sira iha munisípiu Baucau.
Prezidente Autoridade Munisipál (PAM) Baucau, Veneranda Lemos Martins, esplika hosi fini hamutuk tonelada 10 referida korresponde ba kilógrama rihun 10 ne’ebé fahe ba saka 312 no sei benefísia natar hamutuk ektare 667 iha postu administrativu ualu.
“Agora simu lai saida mak governu sentrál fó. Serbisu lai ba hodi hatudu katak ita bele halo produsaun,” Veneranda hateten iha sala VIP Administrasaun Vila Nova, Baucau, tersa ne’e.
Númeru fini hare mensionadu, sei fahe ba kada postu administrativu kompostu husi Baucau Vila kilógrama 2.500 ka saka 78, sei kuda ba natar ektare 167, Quelicai hamutuk kilógrama 700 (22 saka), sei kuda ba natar ektare 47, Venilale kilógrama rihun rua (saka 63) ne’ebé sei kuda ba natar ektare 133, postu Baguia hamutuk kilógrama rihun 1 husi tótal saka 31 ne’ebé sei kuda ba natar ektare 67, Vemasse kilógrama rihun 2 ka saka 63, sei kuda ba natar ektare 133, Laga kilógrama rihun 1 husi saka 31 sei kuda ba natar ektare 67, postu Matebian hamutuk kilógrama 300 husi saka sia ne’ebé sei kuda ba natar ektare 20 no postu Quelicai Antiga tótal fini kilógrama 500 husi saka 15, ne’ebé sei kuda ba natar ektare 33.
Aleinde ne’e, Autoridade Munisipál Baucau mós fahe uniforme hamutuk item ualu ba koordenadór estensionista kompostu husi botas, pasta, xapeo, kamizola, kapa udan, jas udan no livru ajenda.
Entretantu, tótal natar iha munisípiu Baucau hamutuk ektare rihun 14-resin kompostu husi ektare 667 ativa, enkuantu 13.300-resin abandonadu ne’ebé destinadu iha suku 62, postu administrativu ualu.
Jornalista: Natalino Belo
Editór: Xisto Freitas da Piedade
