BAUCAU, 04 fevereiru 2025 (TATOLI)–Autoridade Administrasaun Munisipál (AAM) Baucau distribui tratór hamutuk 30 bá postu administrativu ualu atu halo jestaun no kontrolu efetivu liután bainhira halo operasaun iha baze.
“Administradór sira tenke identifika fatin iha postu atu asegura tratór sira-ne’e, depois mak identifika no halo oráriu ba jestaun tratór nian,” Prezidente Autoridade Munisipál (PAM) Baucau, Veneranda Lemos Martins, hateten iha sala VIP Administrasaun Vila Nova, Baucau, tersa ne’e.
Nia haktuir katak antes ne’e mekanizmu distribusaun tratór diretamente fahe kedas husi Serbisu Munisipál Agrikultura bazeia ba proposta husi grupu agrikultór, maibé atuál iha mudansa hanesan sei halo jestaun liuhosi administrasaun postu sira no sei koordena ho xefe suku antes utiliza husi grupu agrikultór sira.
Prezidente Autoridade Munisipál Baucau ne’e konsidera katak Baucau iha poténsia ba setór produsaun agríkola liuliu fós, mezmu nune’e presiza iha kooperasaun entre autoridade postu, suku, koordenadór estensionista no grupu agrikultór sira nune’e utiliza tratór ho loloos no bele reativa fali natar ne’ebé abandonadu.
“Ita ko’alia hakarak hasa’e produsaun maibé tenke serbisu hamutuk nu’udár ekipa ida, tanba bele fa’an iha merkadu no bele redús importasaun fós husi rai-li’ur,” Veneranda akresenta.
Tratór hirak-ne’e distribui ba postu administrativu Vemase iha 4, Venilale 3, Baucau Vila 9, Matebian 2, Quelicai Antiga 3, Baguia 3, Laga 3 no Quelicai 3.
Entretantu, munisípiu Baucau iha tótal natar hamutuk ektare rihun 14-resin kompostu ektare 667 mak ativa, enkuantu rihun 13.300-resin mak abandonadu ne’ebé destinadu iha suku 62, postu administrativu ualu.
Jornalista: Natalino Belo
Editór: Xisto Freitas da Piedade
