iklan

EKONOMIA, HEADLINE

Jullu, TL organiza Dili International Expo

Jullu, TL organiza Dili International Expo

Ministru Komérsiu no Indústria, Filipus Nino Pereira. Imajen Tatoli/Antonio Daciparu

DILI, 04 fevereiru 2025 (TATOLI)–Ministru Komérsiu Indústria, Nino Filipus Pereira, hateten Timor-Leste liuhosi Ministériu Komérsiu no Indústria (MCI-sigla portugés) sei organiza Dili International Expo iha fulan-jullu tinan ne’e.

“MCI atu organiza Dili International Expo iha fulan-jullu tinan ida-ne’e hodi introdús ita-nia produtu lokál hanesan destinu ida iha merkadu internasionál, ho objetivu atu hasa’e persentajen esportasaun produtu lokál iha merkadu internasionál,”  Nino dehan ba jornalista sira iha Kompañia Daikyo Industrial Gas & Equipment,  Fomento I, Dili, tersa ne’e.

Nia esplika, atu hahú Dili International Expo, MCI ho Câmara Comércio e Indústria Timor-Leste (CCI-TL) halo ona koordenasaun ba iha empreza lokál sira, negósiu ki’ik, setór privadu sira inklui emprezáriu sira hodi hala’o atividade halibur negósiu ne’e iha munisípiu sira.

“Halibur negósiu ne’e  ami mós sei hala’o atividade feira nian, talk show, matching negósiu, enkontru entre setór privadu sira, enkontru povu ba povu hodi identifika produtu potensiál iha kada munisípiu hodi aliña ba iha esportasaun,” nia informa.

Nino haktuir, daudaun ne’e Timor-Leste nia esportasaun komersiál ne’e balansu negativu, sasán importasaun ne’e aas tebes kompara ho sasán esportasaun ba rai-li’ur, tanba ne’e Dili International Expo ne’e krusiál tebes atu promove sasán potensiál ba merkadu internasionál.

Ho Dili International Expo, nia hatutan, sei introdús Timor-Leste nia produtu ba emprezáriu internasionál sira, emprezariál sira inklui setór privadu sira hodi promove Timor-Leste nia produtu lokál ba merkadu internasionál ho objetivu atu hasa’e esportasaun sasán Timor-Leste nian iha nível mundiál.

Entretantu, valór importasaun Timor-Leste nian to’o novembru 2024 atinje $868.952.829, kompara ho valór esportasaun nasaun nian iha tinan hanesan foin maka $80.977.568. Tanba ne’e, iha lakuna liu 700.00 husi sasán sira, ne’ebé TL tenke esforsu atu atinje entre 10 to’o 15 % ba potensiál produtu lokál bá merkadu iha nível internasionál.

Jornalista: Felicidade Ximenes

Esditór: Xisto Freitas da Piedade

iklan
iklan

Leave a Reply

iklan
error: Content is protected !!