BAUCAU, 04 fevereiru 2025 (TATOLI)—Prezidente Autoridade Munisipál (PAM) Baucau, Veneranda Lemos Martins enkoraja Baucau-oan atu hasa’e produsaun agríkola nune’e bele responde ba Programa Merenda Eskolár ne’ebé implementa iha Edukasun Munisípiu Baucau.
Veneranda Lemos esplika katak kada tinan orsamentu jerál Estadu (OJE) ne’ebé atribui ba munisípiu Baucau ba kestaun Programa Merenda Eskolár ho montante boot, maibé produsaun agríkola sei menus nune’e seidauk bele responde ba merkadu iha Baucau.
“Tenki hasa’e produsaun tanba merkadu boot liu iha Baucau mak merenda eskolár ne’ebé konsideradu ninia orsamentu boot kada tinan,” Prezidente Autoridade Munisipál Baucau hateten iha sala VIP Administrasaun Vila Nova, Baucau, tersa ne’e.
Eis deputada ne’e hatutan presiza serbisu hamutuk entre entidade relevante sira nune’e bele atinje objetivu hasa’e produsaun liuliu identifika risku hotu hanesan fini, ekipamentu, irrigasaun no bee.
“Ita tau hanoin hamutuk hotu sai ekipa boot iha setór agrikultura bele dehan Baucau hasa’e ona produsaun,” Veneranda Lemos otimista.
Produtu agrikultura ne’ebé presiza iha programa referidu mak fós, liis, fehuk-ropa, tomate, repollu, señora, naan no seluk tan ne’ebé poténsia atu hasa’e produsaun iha munisípiu Baucau.
Entretantu, Autoridade Administrasaun Munisipál Baucau iha tinan ne’e aloka orsamentu ba Programa Merenda Eskolár hamutuk $261. 990.00 ne’ebé transfere direta ba bankária eskola hamutuk 230 kompostu eskola pre-eskolár, ensinu báziku privadu no públiku.
Programa Merenda Eskolár ne’e benefísia estudante hamutuk 32.730, ho tótal loron efetivu hamutuk 150 ne’ebé bazeia ba livru matadalan fahe ba 75% husi produtu lokál no pursentu 25 produtu importadu.
Tuir livru matadalan programa merenda eskolár, kada semana fahe oráriu hanesan, hosi loron-segunda, estudante sira sei han etu, modo, na’an bifi, mostarda no hudi tasak, tersa han etu, manu-tolun, ai-farina tahan no ai-dila tasak.
Menu ba loron kuarta kompostu etu, modo koto mean, na’an karau no salada-fruta, kinta etu no na’an, modo raba-raba no sobremeza (es-buah), enkuantu iha loron-sesta menu etu, modo tempe, taho, fore-xikote no salada-fruta.
Jornalista: Natalino Belo
Editór: Xisto Freitas da Piedade