DILI, 05 fevereiru 2025 (TATOLI)–Ministru Juventude Desportu Arte no Kultura (MJDAK), Nelyo Isaac Sarmento, hateten Guine Bissau no Guiné Equatorial mak konfirmadu laiha atleta futeból partisipa iha jogu Komunidade Nasaun Ko’alia Lian Portugés (CPLP), maibé sira iha atleta ne’eb sei partisipa iha modalidade seluk.
Notísia Relevante: Governu garante sei konklui hadi’a infraestrutura antes jogu CPLP hala’o
“Nasaun sia mak sei mai tuir jogu CPLP ne’e inklui ita Timor-Leste, maibé iha modalidade hotu iha. Maibé nasaun rua konfirmadu sira laiha modalidade futeból, entaun sira nia futeból labele kompete iha jogu ne’. Entaun modalidade futeból nasaun hitu (7) de’it mak sei kompete,” Ministru Nelyo Isaac hateten ba Agência TATOLI iha edifisiu Ministériu Negósiu Estranjeiru no Kooperasaun (MNEK), Dili, ohin.
Modalidade ne’ebé atu kompete iha jogu CPLP ne’e mak hanesan futeból, voleiból, xadres, tenis kampu, basketból 3 on 3, atletizmu no lompat jauh no tolak peluru.
“Lompat jauh ho tolak peluru, ita seidauk iha kampu, maibé ita sei konstrui kampu foun ba atividade rua ne’e, ita sei hala’o iha Estádiu Munisipál Dili,” nia dehan.
Aleinde ne’e, nia informa, daudaun ne’e atleta ho delegasaun ne’ebé rejistu atu partisipa iha jogu ne’e liu ona ema hamutuk 700.
Iha 22 fevereiru 2025, nia informa, ekipa husi jogu CPLP sei mai Timor-Leste hodi haree preparasaun hotu lori atleta husi nasaun hotu nia naran ne’ebé rejistradu ona iha komisaun jogu.
Jogu CPLP ba tinan ida-ne’e sei realiza iha 17-27 jullu 2025 ne’e, sei partisipa husi nasaun membru sira hanesan Portugál, Brazil, Guiné Bissau, Guiné Equatorial, Moçambique, São Tome e Principe, Cabo Verde, Ángola no Timor-Leste rasik.
Totál orsamentu ba jogu CPLP husi preparasaun to’o ramata Governu tau ona orsamentu tinan 2025 nian ho montante millaun $3.7.
Notísia Relevante: TATOLI, I.P-RTTL, E.P sei halo transmisaun direta ba jogu CPLP
Jornalista : Hortencio Sanchez
Editór : Cancio Ximenes
