LIQUICA, 04 fevereiru 2025 (TATOLI)-Bispu Dioseze Maliana, Dom Norberto do Amaral fó sakramentu Krizma ba krizmadu hamutuk 400-resin iha ámbitu selebrasaun misa solene padroeiru parókia São João de Brito (SJB), Liquiça tersa ne’e.
Iha omília, Bispu Dioseze Maliana husu ba krizmadu sira atu sai soldadu Kristu nian no moris tuir ema Kristaun hodi kontribui ba Igreja no Estadu.
“Simu Sakramentu Krizma katak simu pose sai nu’udar soldadu Kristu nian. Iha imi 400 ne’e, sai soldadu Kristu iha sarani sira nia le’et. Maromak bolu imi atu sai sasin kona-ba fiar, kona-ba ita-nia esperansa, ita-nia karidade. Ne’e duni, ha’u dehan ba imi ba haklaken fiar ne’e ho esperansa no karidade,” Bispu Dom Norberto do Amaral hateten, iha ámbitu selebrasaun misa solene padroieru Parókia São João de Brito, Liquiça, ohin.
Prezidente Episkopál Timorense ne’e afirma, krismadu sira tenke kaer-metin fiar ho esperansa ne’ebe boot hodi halao moris lorloron ho karidade, no hala’o karidade ida-ne’ebé ho hahalok no laran-luak nian hodi hetan di’ak ba isin no klamar tuir doutrina igreja Katólika nian.
Dom Norberto do Amaral husu krizmadu sira atu banati tuir hahalok são João de Brito hodi fó nia aan tomak ba servi Maromak iha moris tomak ho nune’e nia husu sarani sira banati tuir hahalok ida-ne’e.
Sarani sai hanesan Kristu hodi haklaken Maromak nia liafuan ba ema seluk.
“Sarani katak sai hanesan mós Kristu hodi haklaken Maromak nia liafuan ba ema seluk. Jesus bolu ema ida-idak nia naran hodi haruka ba haklaken Nai nia liafuan, husu de’it katak ita bele disponibiliza ita-nia aan, iha prontidaun tomak ba Maromak nia laran-luak no laran-di’ak atu ba hala’o misaun ne’ebé Maromak haraik ba ema ida-idak maibé tenke ho neon ho laran tomak hodi halao misaun ida ne’ebe boot tebes,” amu haklaken.
Dom Norberto fó hanoin mós ba sarani sira atu sadere aan ba Maromak, providénsia dívina, duke sasán mundu nian, hodi konfia ba Maromak nia laran-di’ak, laran-luak hodi hala’o misaun ba mundu.
Enkuantu, antes hahú selebrasaun atividade ekleziástika, Artista no emprezáriu timoron Abio Salsinha, entrega kadeira misa nian hamutuk 50 ba Primeiru-ministru Kay Rala Xanana Gusmão no kontinua entrega ba paróku Liquiça.
Iha ámbitu selebrasaun misa solene padroeiru Parókia são João de Brito Liquiça no Sakramentu konfirmasaun nian hala’o mós inaugurasaun ba salaun parokiál no rezidénsia parókia nian. Nune’e mós halo lansamentu ba sítiu parokiál nian hodi fahe informasaun sira espirituál nian iha Parókia São João Brito, Liquiça.
Entretantu, marka prezensa iha selebrasaun misa solene padroeru Parókia são João de Brito Liquiça, alende Primeiru-ministru Kay Rala Xanana Gusmão, iha mós membru Governu balun, relijiozu sira hanesan padre no madre no mós sarani sira iha munisípiu Liquiça.
Jornalista : Anito Soares
Editór: Rafael Ximenes de A. Belo
