BAUCAU, 05 fevereiru 2025 (TATOLI)—Komandu Polísia Nasionál Timor-Leste (PNTL) munisípiu Baucau durante fulan-janeiru rejista kazu hamutuk 56.
Komandante PNTL Munisípiu Baucau, Superintendente João Sancho Pires, esplika kazu hirak-ne’e kompostu husi krime insidente hanesan violénsia doméstika no asidente tráfegu ne’ebé relata ona ba Ministériu Públiku (MP) atu kontinua prosesu iha Tribunál Distritál Baucau (TDB).
“Kazu hotu ne’ebé iha hanesan violénsia doméstika ne’e krime. Ita orienta hela ba Unidade Polísia Vulnerável (VPU) atu relata ba Ministériu Públiku atu prosesa,” Komandante PNTL Baucau hateten iha ninia kna’ar fatin, Vila Nova, Baucau, kuarta ne’e.
Husi númeru kazu referida, nia esplika, kompostu husi kazu violénsia doméstika no ofensa asaltu hamutuk 43 ne’ebé prosesa iha komandu PNTL, kompostu husi postu administrativu Baucau Vila hamutuk kazu 31, Quelicai hitu, Laga ida no Venilale haat.
Enkuantu, kazu asidente tráfegu hamutuk 13 ne’ebé rezulta lakon vida iha na’in-ida, ne’ebé akontese iha Uailacama (suku Bucoli) no restu kanek kamaan tanba asidente singulár no xoke malu entre motorizada.
Superintendente João Pires, informa sei envolve seksaun hotu hanesan tránzitu, investigasaun atu serbisu hamutuk ho autoridade lokál nune’e kontinua sosializa lei tránzitu ba komunidade para prevene krime.
Jornalista: Natalino Belo
Editór : Xisto Freitas da Piedade
