DILI, 06 fevereiru 2025 (TATOLI)—Institutu Defeza Nasionál (IDN) sosializa Kursu Estadu Maiór Konjuntu Integradu (CEMCI-sigla portugés) dahaat ba ofisiál FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) molok bá implementasaun iha tinan ne’e.
“Tinan ida-ne’e planu husi Institutu Defeza Nasionál atu realiza kuarta edisaun ba Kursu Estudu Maiór Konjuntu Integradu no kursu ida-ne’e ba nível superiór sira ne’ebé mai ho Postu Superintendente Asistente no Superintendente no ba sira ne’ebé mak ho Postu Majór no Tenente Koronél ne’ebé seidauk tuir kursu kona-ba Estadu Maiór nian,” Diretór Interinu Institutu Defeza Nasionál (IDN), Guilherme Soares, hateten ba jornalista sira hafoin partisipa sosializasaun CEMCI ne’ebé organiza husi IDN iha Palácio do Governo, kinta ne’e.
Nia dehan, kursu ne’e tuir loloos atu hala’o iha tinan kotuk maibé la konsege tanba presiza prepara kondisaun balun molok avansa ba implementasaun.
Nia hatutan katak kursu referidu atu forma ema-nia karater sai disiplina iha serbisu fatin no ninia atividade sira.
Guilherme haktuir, tinan ne’e, IDN mós sei halo formasaun pós-graduasaun ba iha estudo do mar nian ka estudu kona-ba tasi nian.
Diretór Interinu IDN ne’e mós akresenta katak, tinan ne’e, IDN sei kontinua fó kursu ba área kapitaun nian ne’ebé sei hahú iha fulan ne’e.
Nia dehan, tinan ne’e, IDN mós kontinua fó kursu mestradu ba iha área seguransa no dezenvolvimentu sustentável no aleinde ne’e atribui mós formasaun karater no memória estratéjika kona-ba estudo do mar inklui estudu interese nasionál ba funsionáriu públiku sira.
Iha biban ne’e, Diretór IDN salienta, papél Institutu Defeza Nasionál ho baze estatutu kriasaun IDN nian ne’e foka ba formasaun ba forsa armada no forsa seguransa no mós formasaun administrasaun públika ba sosiedade sivíl sira.
“Durante 2013 to’o mai 2024, Institutu Defeza Nasionál fó ona formasaun ba ema 1.400. Husi parte forsa armada nian 100-resin, hanesan mós ba PNTL iha 100-resin,” nia haktuir.
Guilherme rekoñese durante ezisténsia IDN enfrenta difikuldade ba rekursu umanu tanba formasaun barak ne’ebé IDN fó ne’e sempre halo parseria ho nasaun seluk. Tan ne’e, Institutu Defeza Nasionál bá-oin hakarak korpu dosente tanba IDN iha formasaun ba mestradu nian.
Nia dehan, dezafiu seluk mak infraestrutura. IDN labele halo formasaun barak tanba espasu menus. Terseiru dezafiu mak enkuadramentu legál seidauk iha.
Iha fatin hanesan, Vise Xefe Estadu Maiór Jenerál F-FDTL, Majór Jenerál Calisto dos Santos Coliati, promete katak apartir 2025 bá-oin, Komandu F-FDTL sei autoriza filafali antigu alunu sira ne’ebé uluk hetan mellór klasifikasaun hodi apoia Institutu Defeza Nasionál nune’e bele fó fali formasaun ba ofisiál F-FDTL ne’ebé partisipa Kursu Estadu Maiór Konjuntu Integradu dahaat 2025.
“Hanesan ho informasaun ne’ebé mak ohin komandu hetan iha konferénsia ida-ne’e, ami sei halo planu atu integra filafali mai iha Institutu Defeza Nasional ofisiál sira ne’ebé konsege hetan rezultadu mellór iha Institutu Defeza Nasionál hahú 2013 to’o mai agora,” nia dehan hodi responde ba difikuldade rekursu umanu entermu formadór ne’ebé IDN enfrenta.
Major Jeneral Coliati rekoñese katak enkuadramentu legál sai dezafiu ba IDN no ida-ne’e nu’udár kestaun administrativa maibé komandu tau atensaun, sei ko’alia ho Xefe Estadu Maiór Jenerál F-FDTL no Ministru Defeza atu diskute para solusiona tiha kestaun ne’e.
Entretantu, Komandante Pessoa no Formasaun, Superintendente Xefe Polísia, Arquimino Ramos, hateten PNTL mós sei prepara nia ofisiál sira atu mai tuir kursu referidu.
Kona-ba rekursu iha IDN, Arquimino tenik, hanesan antigu alunu ba kursu Estudu Maiór Konjuntu iha IDN, prontu atu apoia IDN.
Jornalista: Natalino Costa
Editór: Xisto Freitas da Piedade
