DILI, 07 fevereiru 2025 (TATOLI)—Diretór Nasionál Turizmu Komunitáriu no Ekolojia iha Ministériu Turizmu no Ambiente, Agostinho Marçal, dehan iha tinan 2024 Governu apoiu grupu benefisiáriu sira hamutuk 14 iha munisípiu ualu.
“Durante iha 2024, ita apoia grupu benefisiáriu sira hamutuk 14 husi munisípiu ulau hanesan iha Manatutu iha suku Orlalan, postu administrativu Laklubar, ne’ebé konstrui kafetaria ida, mellora baraka negosiante sira, dada bee-moos, toilet públiku, photo-booth,” Agostinho informa ba TATOLI iha nia kna’ar fatin, sesta ne’e.
Nia dehan, munisípiu Ermera Governu apoiu iha suku Riheu konstrui moru hodi salva uma subar fatin Primeiru-Ministru, Kay Rala Xanana Gusmão, iha Letefoho instala bee-moos, lampu ba iha Kristu Liurai no arku benvindu.
Munisípiu Likisá implementa iha Maumeta konstrui kanalizasaun bee no toilet públiku, depois Maubara halo kafetaria, restaurante inklui fasilidade gazebo, toilet, fura no dada bee-moos, Likisá Dato sei konstrui kafetaria ida inklui fasilidade gazebo no toilet.
Iha munisípiu Dili, hala’o iha Ataúru Vila, suku Maumeta, hadi’a fasilidade kafetaria no restaurante inklui reabilitasaun mini restaurante, iha Colmera reabilita restaurante no fasilidade ba restaurante inklui suku Madohi konstrui kafetaria no fasilidade, toilet públiku, gazebo rua, photos-booth no seluk tan.
Iha Rejiaun Administrativa Espesiál Oekusi Ambenu (RAEOA), fatin implementasaun iha Oekusi Vila, konstrui fatin kafetaria ida inklui fasilidade sira.
Munisípiu Baucau, implementadu iha Vila Antiga, halo manutensaun ba fasilidade ki’ik no indústria sira.
Munisípiu Ainaru, reabilita fasilidade no kafetaria, iha Soru Kraik halo manutensaun fasilidade restaurante. Munisípiu Lautein konstrui kanalizasaun bee-moos no kanopi.
Nia haktuir, tinan 2024, orsamentu ne’ebé apoiu ba grupu benefisiáriu sira maihusi fundu transferénsia públika hamutuk rihun $200 no kapitál dezenvolvimentu iha rihun $100.
“Pakote iha 2024 ne’e bainhira ramata, ita sei fó formasaun ba sira nune’e sira bele komprende didi’ak oinsá atende ema vizita restaurante no kafetaria sira,” Agostinho afirma.
Nia informa, iha tinan 2025, Ministériu Turizmu no Ambiente liuhusi Diresaun Nasionál Turizmu Komunitáriu no Ekolojia planu atu apoiu tan grupu benefisiáriu sira iha munisípiu Aileu, Oekusi, Manatutu no Vikeke.
Jornalista: Felicidade Ximenes
Editór: Xisto Freitas da Piedade
