BAUKAU, 07 fevereiru 2025 (TATOLI)— Ministru Interiór (MI), Francisco da Costa Guterres enkoraja funsionáriu instituisaun tutelada ne’ebé hala’o kna’ar iha munisípiu Baukau atu serbisu ho disiplina.
Ministru Interiór indika ba instituisaun tutelada sira iha Ministériu Interiór hanesan Autoridade Protesaun Sivíl (APC-sigla portugés), Diresaun Nasionál Prevensaun Konflitu Komunitária (DNPCC-sigla portugés) no Seguransa Patrimóniu Públiku, iha-ne’ebé instituisaun hirak-ne’e konsideradu importante tanba nu’udár liman, ain, tilun no matan governu sentrál no lokál iha baze hodi tau-matan ba komunidade.
“Idak-idak iha ninia funsaun, tenke tane as funsaun ho disiplina tanba bainhira iha disiplina sei hala’o tuir regra ne’ebé iha,” Francisco hateten bainhira vizita no halo avaliasaun serbisu iha Salaun Apuramentu Administrasaun Vila Nova, Baucau, sesta ne’e.
Francisco Guterres konsidera katak bainhira funsionáriu sira husi instituisaun tolu ne’e laiha disiplina sei fó prejuizu ba Estadu no iha impaktu ba povu tanba la ezerse funsaun ho loloos tuir kna’ar no kompeténsia ne’ebé estabelesida ona.
Guterres realsa APC tenke preparadu iha kualker oras tanba ho prezensa iha komunidade bainhira akontese situasaun dezastre, bele fó esperansa ba povu mezmu lakon ona sasán tanba instituisaun ne’e hala’o kna’ar hodi proteje komunidade husi risku.
DNPCC Baukau destaka ona funsionáriu iha postu administrativu ualu no hala’o kna’ar hanesan deteta sinál konflitu, halo kontatu autoridade lokál tantu sivíl no militár hodi prevene konflitu inklui halo mediasaun hodi buka solusaun ba problema iha komunidade.
Enkuantu, Seguransa Patrimóniu Estadu presiza disiplina iha oras serbisu tanba aleinde halo seguransa iha edifísiu públiku, maibé halo kna’ar importante seluk mak tau-matan ba dokumentu ne’ebé asegura iha patrimóniu Estadu.
Partisipa iha enkontru avaliasaun ne’e mak Ministru Interiór rasik, Sekretária Munisipál Asuntu Sosiál, Maria Viegas, diretór nasionál no funsionáriu sira.
Jornalista: Natalino Belo
Editór: Xisto Freitas da Piedade
