DILI, 10 fevereiru 2025 (TATOLI)—Vise-Ministru ba asuntu Parlamentár, Adérito Hugo da Costa, informa estrada Gleno bá Letefoho no Ermera Antiga daudaun ne’e iha faze preparativu tékniku no administrativu.
“Hakarak dehan Ermera hola parte iha munisípiu sira seluk ne’ebé iha progresu preparativu tékniku no administrativu la’o de’it ona, hein de’it lansamentu,” Vise-Ministru hato’o hodi responde preokupasaun deputadu sira, iha reuniaun plenária iha Parlamentu Nasionál (PN), segunda ne’e.
Governante ne’e klarifika, la’ós tanba vizita Primeiru-Ministru, Kayrala Xanana Gusmão no Ministru Obra Públika, Gastão de Sousa foin lalais bá Ermera mak foin komunika hodi atu halo reabilitasaun estrada.
“Ha’u adianta ona, iha tinan kotuk iha fatin ne’e tama hotu ona iha programa atu halo konkursu, ne’ebé ninia prosesu la’o hela,” nia akresenta.
Vise-Ministru dehan, la fásil atu rejista obra ida tama ba prosesu aprovizionamentu, tanba ne’e lori tempu.
“Ho de’it manifestasaun ida grupu joven na’in hira iha loron-haat liubá, Governu atu hakfodak kedas lansa projetu iha Ermera, ne’e sala, la fásil estrada sira hanesan ne’e tama iha lista,” nia tenik.
Notísia relevante : Deputada CNRT husu Governu tau atensaun estrada Gleno bá Letefoho-Ermera Antiga
Nia katak, daudaun tempu udan boot, tanba ne’e Governu atu normaliza de’it dalan sira tanba mota no rai monu.
“La’ós halo projetu permanente hodi populasaun sira bele asesu dalan, ba projetu sira permanente konstrusaun aguarda to’o udan para sira bele halo mobilizasaun sasán,” membru Governu ne’e hatutan.
Projetu permanente sira kontinua preparasaun administrativa ne’ebé envolve MOP, Ajénsia Dezenvolvimentu Nasionál, Institutu Públiku (ADN, I.P), Komisaun Nasionál Aprovizioanemtnu (CNA, sigla portugés) hodi akompaña kompañia ne’ebé asina ona kontratu bele mobiliza ekipamentu.
Deputadu Bankada Opozisaun husi Frente Revolucionária de Timor-Leste Independente (FRETILIN), Oscar Lima, espera bele lansa ona projetu konstrusaun estrada Gleno bá Letefoho no Ermera Antiga tanba estrada ne’e ho kondisaun grave tebes.
Jornalista : Nelson de Sousa
Editora : Julia Chatarina
