DILI, 10 fevereiru 2025 (TATOLI)–Ministériu Juventude, Desportu, Arte no Kultura (MJDAK) liuhosi Diresaun Nasionál Patrimóniu, Lojístika no Infraestrutura, hasoru malu ho Ajénsia TIC Timor, Institutu Públiku (TIC Timor, I.P) atu hametin kooperasaun iha setór dezenvolvimentu infraestrutura dijitál nian.
Enkontru ne’e ho objetivu atu ko’alia kona-ba fornesimentu internet fibra ótika ba MJDAK, utilizasaun email ofisiál ministériu nian no fornesimentu internet ba Sentru Juventude sira iha munisípiu 13 iha Timor-Leste.
“MJDAK hasoru dezafiu iha asesu ba liña internet, uza email ofisiál no iha konektividade Sentru Juventude sira iha munisípiu 13 ne’e. Ami agradese ba TIC TIMOR ba sira-nia disponibilidade no ami fiar iha parseria ida-ne’e hodi hetan solusaun ne’ebé efetivu,” Diretora Nasionál Patrimóniu, Lojístika no Infraestrutura iha MJDAK, Maria Luisa Monteiro, hateten ba Agência TATOLI, iha edifisiu MJDAK, ohin.
Diretór Ezekutivu TIC Timor I.P, Venâncio Pinto, hateten kompromisu ajénsia nian atu apoia setór ne’e, tuir misaun Governu nian hodi promove modernizasaun teknolójika.
“TIC Timor prontu atu fó apoiu bainhira de’it husu, tanba ami-nia misaun mak dezenvolve Teknolojia Informasaun no Komunikasaun no hametin Governu eletróniku iha instituisaun Estadu hotu-hotu inklui MJDAK,” Venancio Pinto hateten.
TIC Timot, I.P garante katak nia ekipa tékniku sei hahú servisu iha semana oin hodi garante email ofisiál no konetividade internet.
Aleinde ne’e, nia hateten, instituisaun rua ne’e konkorda atu mantein koordenasaun kontínua hodi rezolve ho efisiente dezafiu sira iha futuru.
Kona-ba fornesimentu internet ba Sentru Juventude sira, tuir nia, sei kria ekipa konjunta ida entre TIC Timor no MJDAK hodi halo levantamentu tékniku molok projetu ne’e implement.
Enkontru ne’e reforsa kompromisu mútuo entre MJDAK no TIC Timor. I.P hodi buka solusaun atu hadi’a infraestrutura dijitál setór juventude, desportu, arte no kultura, hodi garante efisiénsia no konetividade ne’ebé boot-liu ba servisu ministeriál sira.
Jornalista : Hortencio Sanchez
Editór : Cancio Ximenes
