BAUKAU, 12 Fevereiru 2025 (TATOLI)—Komandu Polísia Nasionál Timor-Leste (PNTL) munisípiu Baukau suspeita autór na’in-tolu halakon FB nia vida iha suku Triloka, postu administrativu Baukau Vila.
Tuir kronolojia, kazu referidu akontese bainhira vítima insiál FB, 25, rejistadu nu’udár abitante husi suku Ostiku, postu Vemasse, lakon vida ho tali ne’ebé suspeitadu tara aan hafoin iha loron-08 Fevereiru hasoru-malu ho nia namorada iha área Aubaka, suku Triloka, postu Baukau Vila.
“Informasaun dahuluk ita rekolla dehan tara aan, maibé ita identifika indikasaun kakorok la hanesan tara aan,” Komandante PNTL Munisípiu Baukau, superintendente João Sancho Pires hateten iha ninia kna’ar fatin, Vila Nova, Baukau, kuarta ne’e.
PNTL liuhosi Eskuadra Postu Baukau Vila to’o iha fatin akontesimentu halo kedas identifikasaun no evakua vítima ba Ospitál Rejionál Eduardo Ximenes (HoREX-sigla portugés) Baukau no deside kontinua transfere ba Ospitál Nasionál Guido Valadares (HNGV-sigla Portugés) hodi halo autópsia ho razaun vítima iha indikasaun lakon vida tanba suspeitadu ema oho.
PNTL Baukau suspeita autór na’in tolu iha indísiu forte envolve iha kazu omisídiu ne’e tanba iha relasaun família ho ODC ne’ebé sai hanesan vítima nia namorada.
“Ita suspeita hela ema na’in tolu. Ita hasa’e ona bá prokuradór husu mandadu kapturasaun no hein rezultadu autópsia mai,” superintendente João Pires haktuir.
Komandu PNTL Baukau rejistu kazu referidu ho númeru Nuc. 16/SIK//PNTL no seidauk fó-sai identidade suspeitu na’in tolu ne’ebé sai suspeitadu halakon FB nia vida tanba sei iha faze investigasaun.
Jornalista: Natalino Belo
Editór: Xisto Freitas da Piedade
