OEKUSI, 13 Fevereiru 2025 (TATOLI) – Diretór Diresaun Rejionál Infraestrutura (DRI) iha Rejiaun Administrativa Espesiál Oekusi Ambeno (RAEOA), Remígio Nunu Sila, relata, iha tempu badak, ekipa husi Institutu Jestaun Ekipamentu no Apoia Servisu Infraestrutura, Institutu Públiku (IGEADI, I.P) dezloka bá halo hasai sedimentasaun no halo normalizasaun iha ponte Bitopa, ne’ebé lokaliza iha aldeia Buquis, uku Usitasa’e, sub-rejiaun Oésilo.
“Ha’u hetan ona orientasaun husi Prezidente Autoridade, nune’e tempu badak orienta Departementu IGEADI,I.P atu bá hasai tiha sedimentasaun hodi labele hamosu risku ba iha komunidade sira-nia hela fatin, natar no toos,” hateten Diretór ne’e iha Oekusi, ohin.
Notísia relevante:Autoridade RAEOA inaugura ponte Bitopa fasilita komunidade sub-rejiaun tolu
Diresaun ne’e mós sei aposta iha Planu Asaun Annuál, nune’e bele tau osan atu hadi’a di’ak liutan ponte referidu.
“Maibé ita hein de’it, autorizasaun planu husi Prezidente Autoridade, karik iha orsamentu ne’ebé sufisiénte, ita-bele tau iha planu atu hadi’a, tanba ponte ne’e alternativa atu liga sub-rejiaun Nítibe, Pássabe inklui Oésilo rasik,” nia dehan.
Iha fatin ketak, Xefe suku Usitasa’e, Tomas Ulan Colo, informa, antes ne’e submete ona pedidu ba Diresaun Rejionál Infraestrutura atu konsidera hodi normaliza tanba ponte Bitopa kuaze atu kotu.
“Tinan kotuk mós problema hanesan ne’e, estraga komunidade nia natar no toos, entaun ita husu apoia iha MOP atu mai haree, karik bele sobu ou hadi’a tan, tanba sei ita husik de’it hanesan ne’e, kada tinan problema sei mosu nafatin no estraga osan de’it, ne’ebé solusaun mak tenke sobu ou aumenta gabiaun halo naruk atu mota labele estraga,” dehan auoridade lokal ne’e.
Notísia relevante:Natar-na’in iha Oésilo husu apoia gabiaun proteje natar ektare 30
Ponte Bitopa konstrui iha 2022, iha mandatu Autoridade sesante ho valór gastu hamutuk $406,945.00, husi Orsamentu Jerál Estadu (OJE) 2022 nian, ho durasaun servisu fulan-haat.
Ponte Bitopa lokaliza iha aldeia Buqui, suku Usitasa’e, sub-rejiaun Oésilo, no ponte ne’e rasik nia medida naruk metru 64 kompleta ho protesaun moru gabiaun metru 170.
Ponte ne’e rasik durante ne’e fasilita komunidade mai husi suku sia, komposta husi suku Usitasa’e, Bobometo no Usitaqueno pertense ba sub-rejiaun Oésilo, suku Abani no Malelat sub-rejiaun Pássabe no suku haat seluk pertense sub-rejiaun Nítibe hanesan, Ban-Afi, Lela-Ufe, Usitaku no Bene-Ufe.
Notísia relevante:Ponte Bitopa-Noetoko sei iha faze manutensaun hosi kompañia
Jornalista: Abílio Elo Nini
Editór: Florencio Miranda Ximenes
