iklan

EKONOMIA, HEADLINE, MUNISÍPIU, OÉ-CUSSE (RAEOA)

Ponte Bitopa-Noetoko sei iha faze manutensaun hosi kompañia

Ponte Bitopa-Noetoko sei iha faze manutensaun hosi kompañia

Kondisaun ponte Noetoko bainhira mota tún. Imajen espesiál.

OÉ-CUSSE, 13 dezembru 2023 (TATOLI –Diresaun Rejionál Infraestrutura (DRI), Rejiaun Administrativa Espesiál Oé-Cusse Ambeno (RAEOA), orienta ona Institutu Jestaun Ekipamentu (IGE, sigla portugés) hamutuk ho kompañia sira atu hadi’a ponte Bitopa No Noetoko tanba sei faze retensaun ba manutesaun.

Notísia relevante: Ponte Bitopa-Noetoko konstrui uza dezeña ponte antiga Oébaha no Bihala

Diretór Rejionál Infraestrutura, Candido dos Reis Amaral, hateten, tipu manutensaun ne’e, atu hasai foer ne’ebé intupida ka taka iha ponte rua ne’e, tanba iha semana kotuk akontese udan boot mota lori ai atraka hodi taka metin ponte sira, nune’e afeta ba bee-mota hodi suli ho di’ak.

Kondisaun ponte Bitopa bainhira mota tún. Imajen espesiál.

“Obra rua ne’e nia solusaun maka agora sei iha responsabilidade kompañia sira ba tinan ida-nia laran iha períodu manutensaun, solusaun seluk, ita mós koordena nafatin ho tékniku sira ho IJE, kuandu iha blokeia tanba iha fo’er ai ruma taka metin iha ponte ne’e, sira preparadu atu hamoos kedas, ne’ebé ita kontinua responsabiliza ba obra sira-ne’e la’ós husik de’it atu hetan estragu,” Candido dos Reis Amaral, ba jornalista sira iha Oé-Cusse, kuarta ne’e.

Nia informa, semana kotuk akontese udan boot mota tún, afeta maka’as iha ponte Noetoko, maibé hafoin udan para, kompañia hamoos tiha fo’er sira iha mota no ponte laran, ikus mai bee-liu ho di’ak, akontesimentu ne’e, afeta mós ba iha ponte Bitopa, maibé normál tanba laiha blokeia ruma hosi fo’er.

Diresaun Rejionál Infraestrutura liuhosi servisu IGE kontinua monitoriza obra sira hotu, ne’ebé foin harii iha, kontinua observa nune’e labele iha impedimentu ba iha transporte públiku nian.

“Tán ne’e ita agradese mós ba komunidade sira-nia preokupasaun, tanba bele ajuda ami atu toma atensaun ba ponte no estrada sira hotu iha territóriu Oé-Cusse, tanba komunidade maka hela besik obra sira-ne’e,” nia orgullu.

Notísia relevante: Molok udan monu rai, komunidade bele asesu ona ponte Bitopa ho Noetoko

Entretantu, ponte Bitopa lokaliza iha aldeia Buqui, suku Usitasa’e, sub-rejiaun Oésilo, no ponte ne’e rasik nia medida naruk metru 64 kompleta ho protesaun moru gabiaun metru 170.

Projetu ne’e ezekuta hosi kompañia Am-Lhichoe Unipesoál, Lda, ho valór kontratu U$406,945.00, Autoridade RAEOA aloka hosi Orsamentu Jerál Estadu (OJE) 2022 nian.

Nune’e mós, ba ponte Noetoko nia medida naruk metru 84 kompleta ho moru protesaun metru 180, no ponte ki’ik rua, iha Neofmetan I metru hitu no Neofmetan II metru 18, lokaliza iha aldeia Neofmetan, suku Ban-Afi, sub-rejiaun Nítibe.

Projetu sira-ne’e ezekuta hosi kompañia Lifau Indah Unipesoál Lda ho kustu $625,451.54, orsamentu ne’e Autoridade RAEOA aloka hosi Orsamentu Jerál Estadu (OJE) tinan 2022  nian.

Notísia relevante:Autoridade RAEOA inaugura ponte Bitopa fasilita komunidade sub-rejiaun tolu

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!