OÉ-CUSSE, 03 maiu 2024 (TATOLI) – Natar na’in-sira iha natar Bitopa, aldeia Buqui, suku Usitasa’e, sub-rejiaun Oésilo, husu Autoridade RAEOA atu apoia konstrui gabiaun (bronjong) hodi proteje natar ektare 30, ne’ebé abandona kuaze tinan haat ona la halai natar.
Notísia relevante: Autoridade apoia foos ba família afetadu inundasaun 25 iha Oésilo
Natar na’in Domingos Neno, hateten, natar ektare 30 ne’e iha fatin rua, Bitopa no Bisako, abandona dezde 2020 to’o ohin loron tanba kada tinan hetan estragu husi mota, nune’e nia espera ho prezensa Autoridade foun liuhusi Sekretária Rejionál Asuntu Agrikultura, bele konsidera.
“Ami atu serbisu natar maibé bee laiha, kanu mós hetan estragu totál, ne’e la’ós foin akontese maibé kada tinan, entaun ami husu Governu bele tau matan ba povu nia natar, tanba tinan haat ona ami-nia natar abandona, durante ne’e Governu seidauk mai haree,” Domingos Neno, ko’alia iha natar Bitopa Oé-Cusse, foin lalais ne’e.
Notísia relevante: RAEOA harii tán gabiaun lima ba suku haat ho kustu millaun $1-resin
Iha fatin hanesan, xefe aldeia Buqui, suku Usitasa’e, Simão Quelo, hateten, natar sira abandona tanba problema bronjong. Tan ne’e iha tempu badak sei sei hato’o pedidu ba Autoridade RAEOA liuhusi serbisu agrikultura, bele tau matan.
“Tanba kanu iha leten, depois bronjong halo tama liu mota klaran, entaun mota mai sobu totál, entaun ita uza atu salva komunidade nia to’os ka salva saida, tanba natar sira-ne’e abandona tina hira ona, tanba ami sei husu hato’o ba agrikultura Oé-Cusse atubele haree no tau matan,” nia husu.
Hatán ba problema ne’e, Sekretária Rejionál ba Asuntu Agrikultura, Filomena Sila, promete sei entegra ba iha Planu Asaun Anuál 2025 nian, nune’e bele harii gabiaun foun.
“Kona-bá gabiaun sira-ne’ebé komunidade sira kestiona, atu hadi’a no halo manutensaun, ha’u mós ko’alia ho xefe departamentu irrigasaun, katak atu tau iha planu orsamentu tinan 2025 nian, maibé husi Autoridade rasik, iha mós projetu emejénsia sei atende hodi halo manutensaun,” nia promete.
Notísia relevante:Autoridade RAEOA aloka millaun $2-resin ba rekonstrusaun gabiaun
Rekorda fali katak, iha setembru 2021, Autoridade RAEOA konsege konstrui gabiaun unidade 19 iha territóriu Oé-Cusse, no unidade ida konstrui mós iha natar sira Bitopa, ne’ebé ezekuta husi kompañia Erihjocia Unipesoál Lda ho valór kontratu hamutuk $129,084.67.
Jornalista: Abílio Elo Nini
Editór: Evaristo Soares Martins
