Autoridade apoia foos ba família afetadu inundasaun 25 iha Oésilo

OÉ-CUSSE, 30 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhusi Sekretáriu Rejionál bá Asuntu Agrikultura, tersa ne’e, apoia família afetadu ba inundasaun uma-kain 25 iha aldeia Buqui, suku Usitasa’e, sub-rejiaun Oésilo.

Notísia relevante: Autoridade apoia nesesidade bázika ba uma-kain 74 iha Naktuka

Sekretáriu Rejionál ba Asuntu Agrikultura, Filomena Sila, asaun sosiál ne’e hala’o, tanba iha fulan marsu foin lalais ne’e, akontese dezastre naturál, udan-boot, mota tún estraga komunidade sira-nia to’os no natar, ho falla kolleta (gagal panen) ba époka 2024.

Tan  ne’e, autoridade lokál sira, liuhusi xefe suku no xefe aldeia, rekolla no submete pedidu apoia bá Autoridade RAEOA, liuhusi Diresaun Rejionál Agrikultura, atu konsidera.

“Foin lalais ha’u rasik mai, haree direita, katak hetan estragu bo’ot husi mota, no la konsege kolleta (gagal-panél) iha tinan ne’e, tan ne’e mak ohin loron ami mai lori foos kilograma 25 hamutuk saka 25 apoia ba komunidade sira atu bele uza konsumu loro-loron nian,” Filomena Sila, ko’alia iha suku Usitasa’e.

Domingos Neno, nu’udar komunidade afetadu, hato’o agradese ba Governu liuhusi Autoridade RAEOA, tanba konsege apoia ai-han, nune’e bele sustenta nesesidade família.

“Ha’u agradese, tanba mota estraga ami-nia natar no to’os, maibé agora Governu tau matan ba povu, hodi entrega foos mai ami atu ajuda netik ami,” nia orgullu.

Simão Quelo, rekomenda ba futuru bele konstrui-tán moru protesaun gabiaun, nune’e bele minimiza estragu iha tempu udan.

“Mota bo’ot, entaun presiza moru gabiaun, tanba natar sira-ne’e abandona kuaze tinan haat ona la hala’i natar, entaun nia solusaun persiza harii tán gabiaun, tanba akontese la’os foin lalai, tinan kotuk mós akontese hanesan ne’e,” nia rekomenda.

Jornalista: Abílio Elo Nini

Editór: Evaristo Soares Martins