BAUKAU, 14 Fevereiru 2025 (TATOLI)—Autoridade suku Ossoala, postu administrativu Vemasse, munisípiu Baukau, tinan ne’e, sei reabilita estrada diresaun aldeia Uaiharebo ba aldeia Kaidenulale liuhosi Programa Nasionál Dezenvolvimentu Suku (PNDS).
Xefe suku Ossoala, Francisco Gama da Costa Lobo, esplika prosesu ba implementasaun atividade regulár síklu dahitu ne’e desizaun finaliza ona liuhosi enkontru autoridade suku ho responsável PNDS munisípiu nune’e sei iha faze levantamentu dadus husi tékniku antes implementasaun.
“Kuandu levantamentu dadus ramata, hein halo prosesu kuotasaun no tuir alvu lais liu fulan-abríl bele implementa ona,” Xefe suku Ossoala informa ba TATOLI liuhosi telefónema, sesta ne’e.
Nia subliña konsellu suku deside halo atividade regulár iha área referida tanba konsidera estrada diresaun aldeia Kaidenulale kategória grave, nune’e liuhosi reabilitasaun bele fasilita komunidade transporta produtu ba merkadu.
Tuir matadalan, implementasaun atividade regulár PNDS liuhosi faze desizaun husi reuniaun konsellu suku, levantamentu dadus, kuotasaun fornesimentu materiál, kontratu badaen no ikus implementasaun.
PNDS tinan ne’e iha suku Ossoala aloka orsamentu menus husi rihun $40 hodi hala’o atividade regulár hanesan reabilitasaun estrada rurál diresaun aldeia Uaiharebo, suku Uatulari ba aldeia Kaidenulale, suku Ossoala ho distánsia kilómetru lima.
Suku Ossoala hamutuk aldeia haat kompostu Hoineuai, Kaidenulale, Uma-ana Iku, Lulinunu no Uaiknase ho tótal populasaun 2.114.
Jornalista: Natalino Belo
Editór: Xisto Freitas da Piedade
