DILI, 14 Fevereiru 2025 (TATOLI)—Sekretaria Estadu Formasaun Profisionál no Empregu (SEFOPE), liuhusi Diresaun Nasionál Empregu no Temporáriu fó formasaun emprendedorizmu ba formandu sira husi sentru formasaun Grace for Development (GFD) besik 400.
“Ami-nia alvu ne’e ba formandu sira husi sentru formasaun no mós finalista husi ensinu sekundáriu no mós tékniku vokasionál sira, liuliu ba programa sira ne’ebé mak liga ho sira-nia nesesidade hanesan emprendedorizmu,” reprezentante Sekretáriu Estadu Formasaun Profisionál no Empregu, Cesaltino de Jesus Guterres, hateten ba jornalista sira, iha salaun Balide, sesta ne’e.
Nia esplika, programa auto empregu nia alvu mak formandu sira gradua ona husi sentru formasaun sira atubele eleva sira-nia abilidade hodi kria servisu ba sira-nia aan rasik.
Iha fatin hanesan, Diretór Sentru Formasaun Grace for Development (GFD), Hilário Gusmão Fraga dehan prezensa SEFOPE iha-ne’e atu hato’o sira-nia papél ba joven sira kona-ba negósiu no mós kampu traballu inklui oinsá atubele bá servisu iha rai-li’ur hanesan Koreia no Austrália.
“Oportunidade ida-ne’e fó ba joven timoroan sira ne’ebé mak mai aprende iha sentru formasaun, entaun formasaun ne’e klaru katak SEFOPE mai hato’o nia papél ba joven sira liuliu kona-ba kria kampu traballu no sira ne’ebé mak atu halo negósiu no mós bá serbisu iha rai-li’ur hanesan Koreia no Austrália,” Hilário esplika.
Diretór ne’e haktuir matéria espesífika ne’ebé SEFOPE aprezenta bá iha formandu sira mak emprendedorizmu oinsá atu harii negósiu sira.
“Ami-nia esperansa ba formandu sira mak banhira sira ramata, balun hetan kampu traballu no balun bá serbisu iha rai-li’ur no rai laran, balun kria rasik kampu traballu ba nia aan rasik no ba komunidade,” nia subliña.
Jornalista: Felicidade Ximenes
Editór: Xisto Freitas da Piedade
