BAUKAU, 17 Fevereiru 2025 (TATOLI)—Autoridade suku Tirilolo, postu administrativu Baukau Vila, munisípiu Baucau, konsidera komputadór no mákina imprime ne’ebé apoiu husi governu liuhusi Ministériu Administrasaun Estatál (MAE), fasilita ona serbisu atendimentu administrasaun iha suku.
Xefe suku Tirilolo, Elvino Freitas Belo, esplika ekipamentu hanesan komputadór no mákina imprime hafásil ona prosesu serbisu atendimentu ba komunidade liuliu prosesa karta iha administrasaun suku.
“Komputadór ita konsidera sufisiente tanba fasilita ona serbisu administrasaun iha suku,” Xefe suku Tirilolo hateten iha ninia kna’ar fatin, Vila Antiga, Baukau, segunda ne’e.
Nia haktuir katak fasilidade hirak-ne’e fahe ba responsável idak-idak hodi apoia ba sekretáriu suku asuntu administrasaun no finansa hanesan halo proposta inklui relatóriu orsamentu suku, atendimentu dadus komunidade, atualiza no sinkroniza dadus sistema livru 18 ligadu ho polítika governu nian kona-ba balkaun únika.
Elvino Belo hato’o ba ekipa suku atu utiliza patrimóniu suku ho loloos, labele rai dokumentu privadu inklui imajen sira ne’ebé laiha relasaun ho serbisu suku nian.
Fasilidade komputadór iha suku Tirilolo hamutuk tolu no mákina imprime rua, ne’ebé antes ne’e apoia hosi Administrasaun Munisipál no Ministériu Administrasaun Estatál.
Suku Tirilolo hamutuk aldeia neen kompostu Betulale, Lutimutu, Kaisido, Lielailesu, Parlamentu no Ossoua ho totál populasaun hamutuk 9.789 husi totál uma-kain 1.702.
Jornalista: Natalino Belo
Editór: Xisto Freitas da Piedade
