BAUKAU, 17 Fevereiru 2025 (TATOLI)—Autoridade suku Tirilolo, postu administrativu Baukau Vila, kontinua fó prioridade ba reabilitasaun estrada liuhosi Programa Nasionál Dezenvolvimentu Suku (PNDS).
Xefe suku Tirilolo, Elvino Freitas Belo, esplika razaun fó prioridade ba estrada tanba konsideradu importante hodi fasilita komunidade iha aldeia no bairru ligadu ho movimentasaun transporte no asesu produtu bá merkadu.
“Ami enkontru no xefe aldeia sira hatama ona planu prioridade no deside ona sei kontinua reabilita estrada tanba fasilita komunidade hala’o atividade,” Xefe suku Tirilolo hateten iha ninia kna’ar fatin, Vila Antiga, Baukau, segunda ne’e.
“Bainhira ita reabilita hotu, tuir ami-nia observasaun, bele rezolve ona preokupasaun komunidade iha suku ne’e,” Elvino Belo akresenta.
Autoridade Tirilolo konsidera katak ho atividade regulár PNDS fó benefísiu tanba lori dezenvolvimentu liuliu rezolve preokupasaun no fasilita estrada no bee-moos ba públiku.
Planu prioridade PNDS ba tinan 2025 síklu VII desididu no submete ona bá postu administrativu inklui enkamiña ba PNDS munisipál nune’e sei hein orsamentu antes kontinua implementa iha aldeia rua hanesan Betulale no Lutumutu, suku Tirilolo.
Tinan 2024, síklu VI reabilita estrada iha aldeia Betulale ho orsamentu rihun $19 iha área Uma-lima ho totál metru 175 ne’ebé mak orsamentu maihusi atividade konstrusaun sentru agríkola iha aldeia Ossoua ne’ebé gastu rihun $30 husi totál orsamentu $ 49.250.
Enkuantu, PNDS síklu V tinan-2023 finaliza ona reabilita estrada iha aldeia Ossoua, Lielailesu, Parlamentu no Kaisido ne’ebé atuál sei iha faze finalizasaun ho totál kilómetru 2,250, ho montante orsamentu rihun $40 resin.
Suku Tirilolo hamutuk aldeia neen kompostu Betulale, Lutumutu, Kaisido, Lielailesu, Parlamentu no Ossoua ho totál populasaun hamutuk 9.789 husi totál uma-kain 1.702.
Jornalista: Natalino Belo
Editór: Xisto Freitas da Piedade
