Horta-Gustavo diskute futuru kooperasaun bilaterál entre TL no Argentina

DILI, 18 Fevereiru 2025 (TATOLI)—Embaixadór Repúblika Argentina mai Timor Leste, rezidénsia iha Jakarta-Indonézia, Gustavo Ricardo Coppa, tersa ne’e, hasoru malu ho Prezidente Repúblika, José Ramos Horta, hodi ko’alia kona-ba futuru relasaun bilaterál entre nasaun rua ne’e, iha Palásiu Prezidensiál Nicolau Lobato, Bairru Pite, Dili.

“Ida-ne’e mak ha’u-nia vizita daruak no hanesan onra ida ba ha’u atu ha ko’alia kona-ba asuntu polítika bilaterál nasaun rua nian. Ha’u dehan ba Prezidente katak ha’u kontente tebes ho relasaun amizade entre nasaun rua ne’e ho nia povu no ko’alia mós kona-ba vizita Papa Francisco nian,” Embaixadór Gustavo hateten ba jornalista sira hafoin remata enkontru.

Liuhusi diskusaun ne’e, Embaxadór sei lori ba Argentina hodi diskute kle’an ho Governu Argentina atu bele hametin relasaun bilaterál entre nasaun rua.

“Ha’u mós sei ko’alia ho Ministériu Negósiu Estranjeiru, oinsá iha rekuperasaun Argentina nian, iha proposta barak kona-ba kooperasaun iha matéria hotu iha ámbitu edukasaun nian,” nia dehan.

Nia dehan, Argentina iha planu atu koopera ho Governu liuliu iha setor edukasaun liuliu iha ensinu superior iha área espesializadu sira.

“Edukasaun ne’e liliu ba universitáriu *estudante) sira iha área ensinu espesializadu sira. ezemplu, iha dezenvolvimentu agríkola, turizmu, nune’e Argentina iha poténsia ne’e hotu atu oferese ba nasaun hotu-hotu. Argentina mós iha poténsia barak atu oferese kooperasaun iha formasaun profesór, maske iha diferensa lian. Ha’u hanoin, ita bele servisu hamutuk iha área ida ne’e,” nia dehan.

Iha biban ne’e, Prezidente Repúblika José Ramos Horta hateten, Timor-Leste ho Argentina labele hala’o kooperasaun komersiál tanba distánsia dook, ho nune’e bele hala’o de’it kooperasaun diplomasia.

“Argentina hanesan nasaun ida-ne’ebé importante tebes, iha Amérika Latina iha nasaun balun hanesan Argentina, Brazil, México, Xile, nasaun hirak ne’e balun importante tebes atu estabelese relasaun diplomátika ne’ebé besik, maske seidauk iha relasaun komersiál, kooperasaun ho sira maibé tenke iha relasaun di’ak,” Prezidente Repúblika hateten.

Ho diskusaun ne’ebé parte rua halo, Xefe Estadu hein katak relasaun entre nasaun rua ne’e, Argentina bele apoiu Timor-Leste liuhosi fó bolsa estudu timoroan sira.

Jornalista : Hortencio Sanchez

Editór        : Cancio Ximenes