LIKISÁ, 18 fevereiru 2025 (TATOLI)- Ministériu Agrikultura, Pekuária, Peskas no Floresta (MAPPF), liuhusi programa Sustainable Agriculture Productivity Improvement Project (SAPIP) ka Projetu Hadi’a Produtividade Agrikultura Sustentável, entrega ekipamentu agríkola modernu ba grupu agrikultór neen iha Postu Administrativu Loes no Likisá vila ho objetivu atu aumenta produsaun haree no redus kustu ba prosesu produsaun nian.
Ministru Agrikultura, Pekuária, Peskas no Floresta (MAPPF), Marcos da Cruz, informa katak MAPPF entrega makina modernu ba agrikultór sira hanesan hand tractor (arrado à mão) ka tratór liman neen, makina kuda haree 12, makina ko’a haree neen no fatin ba viveirus haree 2.950.
Totál membru na’in-119 sai benefisiáriu no orsamentu ne’ebé utiliza hodi sosa ekipamentu sira ne’e ho montante $128,850,00. Ekipamentu sira ne’e sei fahe ba grupu neen iha Postu Administrativu Loes no Likisá, ho hanoin atu aumenta produsaun no redus kustu ba produsaun haree nian.
“Ita ajuda ona ho makina iha fila rai no kuda haree ho razaun dalabarak natar-na’in sira selu traballadór para kuda haree no fukit du’ut nia kustu karun liu. Ita presiza apoia makina ida-ne’e atu fasilita sira hodi halo lalais servisu no redus kustu iha parte kuda haree no mós ba iha kolleta tanba dalabarak ita utilza tradisionál,” Ministru Marcos da Cruz hateten, hafoin entrega ekipamentu sira ne’e ba grupu agrikultór sira Munisípiu Likisá, tersa ne’e.
Tuir governante ne’e, MAPPF nafatin iha polítika atu apoiu ba agrikultór sira no orsamentu ida-ne’e mai husi Banku Mundiál hodi finansia programa ho naran Sustainable Agriculture Productivity Improvement Project (SAPIP) kobre ihamunisípiu hitu no Likisá tama iha programa SAPIP nian. Munisípiu sira ne’ebé tama iha programa SAPIP hanesan Munisípiu Kovalima, Bobonaru, Ainaru, Ermera, Likisá, Lautein, Oekusi.
“Ba munisípiu sira ne’ebé la tama iha programa ida-ne’e mós ita iha ona orsamentu Estadu tinan ida-ne’e, ita iha ona orsamentu aloka hodi sosa makina atu mós distribui ba agrikultura sara iha munisípiu sira seluk,” Ministru Marcos da Cruz garante.
Iha parte seluk, Prezidente Autoridade Munisípiu Likisá, Paulino Ribeiro, kompromete, sei halo monitorizasaun konjuntu entre Diresaun Servisu Fiskalizasaun Munisípiu no Inspetór Jerál Ministériu Agrikultura atu bele servisu hamutuk no kontrola implementasaun ba utilizasaun ekipamentu sira iha grupu laran atu nune’e funsionamentu ba utilizasaun ekipamentu iha grupu sira ne’ebé simu ne’e bele la’o ho di’ak. Se bainhira la la’o maka sei foti medida dada fila-fali ekipamentu sira ne’e no fahe fali ba grupu seluk sira presiza liu.
“Ne’e maka serbisu kolaborasaun ne’ebé ita sei halo hamutuk atu garantia funsionamentu ba sasan sira ne’e la’o ho di’ak i garantia nia sustentabilidade atu nune’e ajuda ita-nia kresimentu ekonómia lokal”, Autoridade Munisípiu Likisá, Paulino Ribeiro dehan.
Prezidente Autoridade fó hanoin katak, produsaun rai-laran hanesan foos no produtu lokál ne’ebé iha, bele fornese ba programa Merenda Eskolar ba o’an sira bele konsumu hahan ne’ebé sabor ba sira-nia isin no bele hetan nutrisaun ba sira-nia kakutak.
Iha fatin hanesan, Grupu Agrikultór Maukurus Lema, husi Suku Leotela Aldeia Lepa, João de Jesus Pinto, lori membru sira-nia naran senti kontente tanba Ministériu Agrikultura, Pekuária, Peskas no Floresta (MAPPF), implementa programa Sustainable Agriculture Productivity Improvement Project (SAPIP) bele fornese ona makina modernu ba agrikultór sira hodi hakmaan sira-nia serbisu halo to’os no natar.
“Ha’u hanoin ho makina sira ne’e grupu sei esforsu maka’as membru sira hotu bele utiliza makina ne’e ho di’ak atu nune’e bele hasa’e produsaun to’os ho natar ninian iha ami-nia fatin”, João de Jesus Pinto hafoin simu tiha makina produsaun ne’e.
Grupu sira ne’e hetan apoiu hosi MAPPF liuhosi programa SAPIP ho orsamentu mai husi Banku Mundiál.
Iha Munisípiu Likisá iha grupu neen maka hetan apoiu uluk iha Suku Lissadila, hamutuk grupu tolu hanesan Primeiru Grupu Kaikasa totál membru 15, Segundu Grupu Tokodede totál membru 14 no Terseiru Grupu Haburas totál membru 15. Iha Suku Leotela, hamutuk grupu tolu hanesan Primeiru Grupu Lara Lepa totál membru 30, segundu grupu Mau Kurus Lema totál membru 30 no terseiru grupu Keimegou Mau Seu totál membru 14.
Entretantu, partisipa iha serimónia ne’e, Autoridade Lokál, Komandante PNTL Munisípiu Likisá, Komandante F-FDTL, Komunidade Suku Loes, Leotela no Likisá Vila inklui grupu benefisiáriu sira.
Jornalista: Francisco Sony
Editór: Rafael Ximenes de A. Belo
