DILI, 20 Fevereiru 2025 (TATOLI)—Autoridade Inspesaun Fiskalizasaun Atividade Ekonómika Sanitária no Alimentár (AIFAESA), taka provizória empreza Perissos no rekomenda ba empreza atu hadi’a kondisaun ijiene, tanba produtu sira barak mak hetan estragu no espiradu.
“Ami mai halo inspesaun haree kondisaun ijiene ladi’ak. Foos barak mak hetan estragu (fohuk no metan hotu). Entaun, ami taka provizória to’o fulan ida (hahú husi data inspesaun). Ha’u husu bá empreza Perissos presiza hadi’a kondisaun ijiene no presiza halo jestaun ne’ebé di’ak, hodibele organiza katak produtu sira ne’ebé mak hanesan espiradu tau ketak, estragadu tau ketak no produtu ne’ebé mak di’ak tau ketak, tanba ita haree katak produtu sira-ne’e tau hamutuk to’o balun sai aat hotu,” Diretora Operasionál AIFAESA, Claudina Soares Pinto, hateten ba TATOLI iha Aimutin, tersa (18/02), bainhira halo inspesaun ba empreza referida.
Nia husu bá Perissos tenke konsidera rekomendasaun sira-ne’e, nune’e hadi’a jestaun ho di’ak.
“Semana ida-ne’e ami halo inspesaun bá iha Perissos, entaun ita deteta produtu balun hanesan fós, mina, sasán báziku sira seluk ne’ebé mak hetan estragu ho kuantidade boot. Tan ne’e, ami sei presiza halo kontajen hira mak ladi’ak tanba Perissos iha armazein neen, entaun ami presiza haree tanba horisehik no ohin ita foka liubá sasán ne’ebé mak espiradu no mós estragu, entaun ita foti sai hotu nune’e ita haree loloos produtu espiradu no estragadu ne’e hira ,” nia informa.
Antes ne’e, Inspetora Jerál AIFAESA, Odete da Silva Viegas, hateten AIFAESA taka provisória atividade negósia empreza Perissos tanba komete infrasaun.
“Ha’u deklara taka provizória atividade negósia hosi empreza Perissos, ne’ebé identifikadu komete irregularidade hanesan fa’an produtu liu prazu, estragadu, laiha kondisaun ijiene no salubridade ba públiku iha armazein Aimutin,” nia dehan.
Nia hateten, enserra temporária no prosesu administrativa mós kontinua la’o tuir gravidade ne’ebé empreza ne’e komete. Tanba ne’e, AIFAESA sei fó tempu fulan (1) ba Perissos hodibele hadi’a kondisaun sira molok reativa fali.
Nune’e, ho kuantidade produtu ne’ebé barak iha armazenamentu refere, ekipa operasionál sira nafatin halo kontajen ba produtu ai-han no la’ós ai-han sira no kontinua transporta ba halo destroisaun iha lixeira Tibar.
AlFAESA identifika fós Manu Vitória, Folsom, Nasi Wangi, Gosto Loos, masin-midar ne’ebé liu ona prazu no nia kór muda ona bá kór kafe inklui batar fó han animál maibé sira tau hamutuk iha armazein.
Atividade kontrolu ne’e, partisipa hosi Inspesaun Jerál Traballu Ministériu Komérsiu Indústria, Tane Konsumidór no Ministériu Saúde.
Jornalista: Felicidade Ximenes
Editór: Xisto Freitas da Piedade
