Grupu Caizi husi Xina sei investe iha área oioin

DILI, 20 Fevereiru 2025 (TATOLI) – Grupu Caizi husi Xina sei implementa projetu iha área oioin iha Timor-Leste mak hanesan komérsiu, abitasaun, otelária, indústria, turizmu, agrikultura no akikultura. Investimentu ida-ne’e besik dólar amerikanu billaun ida.

Delegadu Timor-Leste juntu Sekretariadu Permanente Fórum ba Kooperasaun Ekonómika no Komersiál entre Xina no País Lian Portugeza, António Ramos da Silva, informa katak sei kria Grupu Traballu hodi implementa investimentu ne’e, liuliu oinsá atu rezolve problema títulu ba rai, asegura fornesimentu ba bee no enerjia elétrika.

Grupu Traballu ne’e envolve Ministériu Justisa, Ministériu Planu no Investimentu Estratéjiku, Ministériu Koordenadór Asuntu Ekonómiku, Ministériu Komérsiu no Indústria no seluk tan.

“Pasu tuirmai parte Caizi finaliza dezeñu enjeñeiru, planu finanseiru no investimentu hodi submete ba Governu hodi implementa. Delegadu halo ona komunikasaun ho autoridade Timor-Leste nian hodi aselera prosesu”, António Ramos informa ba Tatoli via WhatsApp, ohin.

Lembra katak Delegadu Timor-Leste hamutuk ho Sekretariadu Permanente Fórum ba Kooperasaun Ekonómika no Komersiál entre Xina no País Lian Portugeza (Fórum Makau) asina, iha 24 Janeiru 2025, iha Makau, Akordu-Kuadru ida ba Investimentu ho Grupu Caizi husi Xina, hodi promove dezenvolvimentu ekonómiku no komersiál iha país.

Akordu ne’e prevee implementasaun ba projetu oioin no inisiativa sira ne’ebé prevee, destaka liu ba kriasaun Sentru Komersiál Dili-Caizi, ne’ebé sei inklui edifísiu sede empreza, otél ida, sentru konvensaun ida no bairru rezidensiál ida.

Fórum Makau ne’e hanesan plataforma intergovernamentál ida ne’ebé harii iha 2003 husi Governu Repúblika Populár Xina, koopera hamutuk ho país lian portugeza sira, ho objetivu atu promove komérsiu, investimentu no kooperasaun ekonómika entre Xina no Estadu membru fórum nian.

Jornalista: Arminda Fonseca

Editora: Maria Auxiliadora