CNE Baukau solisita partidu polítiku partisipa másimu programa edukasaun sívika
BAUKAU, 21 Fevereiru 2025 (TATOLI)—Komisaun Nasionál Eleisaun (CNE-sigla portugés) husu partidu polítiku atu partisipa másimu iha programa edukasaun sivíka.
Diretór CNE munisípiu Baukau, Esmeraldo Damião Belo, esplika mezmu seidauk iha períodu eleisaun maibé nu’udár órgaun eleitorál nafatin realiza atividade edukasaun sivíka ba partidu polítiku no komunidade tanba bele hasa’e koñesimentu kona-ba prosesu hotu relasiona ho festa demokrasia.
“Ita kontinua fanun partidu polítiku sira ho objetivu sira bele hatutan importánsia husi edukasaun sivíka ba iha militante no simpatizante sira iha baze,” Diretór CNE Baukau informa ba TATOLI iha ninia kna’ar fatin, Vila Nova, Baukau, sesta ne’e.
Esmeraldo Belo salienta, matéria importante husi edukasaun sivíka mak hanesan sosializa regra eleitorál, krime eleitorál no prevensaun konflitu bainhira realiza kampaña eleitorál.
Nia konsidera partisipasaun másimu partidu polítiku iha programa referidu bele hasa’e koñesimentu, nune’e futuru realiza eleisaun ruma laiha dezentendimentu entre líder no militante partidu sira iha munisípiu Baukau.
“CNE fó oportunidade ba sira atu hato’o hanoin ruma relasiona ho krime eleitorál,” Esmeraldo Belo haktuir.
CNE rejista partidu polítiku hamutuk 17 mak eziste iha Baukau, kompostu husi partidu lima iha asentu parlamentár, enkuantu 12 mezmu laiha asentu parlamentár maibé konsidera nu’udár instituisaun prinsipál iha demokrasia.
CNE Baukau iha inisiu tinan ne’e realiza ona atividade edukasaun sívika iha suku foun tolu hanesan Ueru-Mata, Caibada Makasa’e no Builai relasiona ho preparasaun eleisaun suku ne’ebé realiza ona iha fulan-Janeiru liubá.
Jornalista: Natalino Belo
Editór: Xisto Freitas da Piedade
