DILI, 21 Fevereiru 2025 (TATOLI)—Prezidente Repúblika, Jose Ramos Horta, sesta ne’e, hamutuk ho embaixadór naun-rezidente no rezidente sira vizita Portu Tibar ho objetivu atu subliña importánsia estratéjiku Portu ne’e nian ba dezenvolvimentu ekonómiku no fasilita komérsiu internasionál.
Notísia Relevante: Resesaun diplomátika hametin TL nia kompromisu ba ‘Building Bridges, Fostering Partnerships’
Liuhusi nota ne’ebé Agência TATOLI asesu katak, husi vizita ne’e atu fornese ba Prezidente Repúblika no delegasaun diplomátika sira bele iha komprensaun ida-ne’ebé kle’an liu kona-ba operasaun portu nian no infraestrutura modernu ho inisiativa sira-ne’ebé foti hodi hasa’e ninia efisiénsia no kompetividade.
“Hafoin aprezentasaun detallu kona-ba portu nia susesu no perspetiva sira, delegasaun ne’e mós vizita terminál hodi haree didi’ak kona-ba teknolojia modernu no sofistikadu iha Portu Tibar, nune’e mós haree diretamente operasaun exelente sira-ne’ebé halo Portu Tibar sai autór prinsipál iha komérsiu marítimu,” refere iha nota ne’e.
Diskusaun ne’e subliña kontribuisaun Portu Tibar nian iha kriasaun empregu, atrai investimentu estranjeiru no ninia papél xave nu’udar odamatan ba komérsiu internasionál.
Prezidente no Embaixadór sira mós troka hanoin ho ekipa jestaun Timor Port Tibar hodi hato’o sira-nia apresiasaun ba kompromisu atu sai referénsia ba efisiénsia no dezenvolvimentu sustentável.
“Simu Prezidente Repúblika no delegasaun embaixadór no diplomata sira hanesan rekoñesimentu ida ba papél boot Portu Timor nian iha eskala rejionál no internasionál,” nota ne’e haktuir.
Iha okaziaun ne’e, CEO Timor Port Laurent Palayer hateten, vizita ne’e subliña misaun atu apoiu kreximentu ekonomiku nasaun nian.
“vizita ne’e subliña misaun atu apoia kreximentu ekonómiku nasaun nian, hametin parseria internasionál sira no koloka Timor-Leste nu’udar meiu prinsipál ba komérsiu rejionál,” Laurent Palayer hateten.
Nia hatutan, Vizita ne’e la’ós de’it hametin Governu nia apoiu ba infraestrutura estratéjiku maibé mós loke perspetiva foun ba kolaborasaun internasionál.
Nune’e, Timor Port reafirma nia kompromisu atu estimula progresu ekonómiku, harii kapasidade komérsiu no koloka Timor-Leste nu’udar sentru importante ba komérsiu rejionál.
Notísia Relevante: Resesaun diplomátika loron daruak ko’alia kona-ba progresu dezenvolvimentu TL
Jornalista : Hortencio Sanchez
Editór : Cancio Ximenes
