DILI, 24 Fevereiru 2025 (TATOLI)—Sekretáriu Estadu Formasaun Profisionál no Empregu, Rogério de Araújo Mendonça ho Embaixadora Hungria naun-rezidente, iha Jakarta-Indonézia, Lilla Karsay, diskute kona-ba programa laborál futuru traballadór timoroan sira iha Hungria.
“Iha enkontru ohin nian, ami diskute kona-ba programa laborál nian iha futuru bá Hungria, entaun embaixadora ne’e husu ba joven sira prepara no kapasita aan ba programa laborál ida -ne’e,” Rogério dehan ba jornalista sira iha Kaikoli, segunda ne’e.
Governante ne’e hatutan programa ne’e hanesan ho Austrália nian, ho durasaun fulan neen to’o fulan sia iha inísiu no depois hanaruk tan ba tinan rua to’o haat.
Nia haktuir katak programa laborál ne’e iha área agrikultura, ortikultura no ospitalidade. “Depois Governu liuhosi Ministériu Negósiu Estranjeiru no Kooperasaun, sei halo koordenasaun ho embaixada ba faze asina nota entendimentu,” nia hateten.
Iha fatin hanesan, Embaixadora Hungria, Lilla Karsay, informa relasaun diplomátika entre Timor-Leste (TL) ho Hungria ne’e kle’ur ona, tanba ne’e nia hakarak serbisu iha kooperasaun iha área formasaun no empregu profisionál ba timoroan sira atu sira bele serbisu iha Hungria, nomeadamente iha área agrikultura, ortikultura no ospitalidade.
“Koperasaun entre Governu ne’e esensiál atu ajuda timoroan sira serbisu iha Hungria. Ita hamutuk ba programa mobilidade traballadór,” Lilla Karsay dehan.
Diplomata ne’e garante katak timoroan sira-ne’e durante ne’e hala’o serbisu iha nasaun europeia sira ho pasaporte portugés, tanba ne’e iha posibilidade atu sira bele serbisu iha Hungria, tanba Portugál pertense ba Uniaun Europeia, entaun ida-ne’e hanesan vantajen ida ba timoroan tomak.
Jornalista: Felicidade Ximenes
Editór: Xisto Freitas da Piedade
