BAUKAU, 25 Fevereiru 2025 (TATOLI) –Ai tohar iha área Ro-ulo, suku Bahu, Postu Administrativu Baukau, kauza husi udan no rai-halai, tersa ne’e, rezulta uma abitante ida hetan estragu no taka dalan diresaun Baukau bá Lautein.
Tuir kronolojia, dezastre naturál ne’e akontese purvolta tuku 14:30 Otl hafoin udan boot, iha-ne’ebé afeta ba rai halai hodi rezulta ai (hali) tohar no fó impaktu ba movimentasaun transporte diresaun Baukau bá Lautein no Lautein-Dili.
“Ai tohar tanba afeta husi udan boot akompaña anin rezulta taka dalan, uma ida no kioske ida hetan estragu,” Komandante Opersionál Autoridade Protesaun Sivíl (APC-sigla portugés), Francisco Viana Freitas hateten ba jornalista iha Vila Antiga, Baucau.
APC hamutuk ho ekipa Bombeiru diretamente to’o iha lokál akontesimentu lori ekipamentu motoserra tesi ai referida no halo evakuasaun ba abitante afetadu.
“Laiha vítima husi akontesimentu ne’e tanba konsege evakua sai husi uma antes ai tohar,” Viana akresenta.
APC hala’o ona kontatu bá Autoridade Munisipál atu apoia tan materiál pezadu nune’e aselera evakuasaun ai referida husi estrada, liuliu bele normaliza hikas movimentasaun transporte públiku diresaun Baukau bá Lautein.
Aleinde ne’e, APC sei verifika dadus loloos uma-kain ne’ebé vitíma ba akontesimentu referidu, nune’e oferese apoia emerjénsia hanesan hahán no ekipamentu koziña antes relata dadus bá nasionál hodi hetan ajuda materiál rekuperasaun.
Jornalista: Natalino Belo
Editór: Xisto Freitas da Piedade
