BAUKAU, 24 Fevereiru 2025 (TATOLI)—Governu liuhosi Sekretaria Estadu Eletrisidade, Bee no Saneamentu (SEEAS-sigla portugés) planeia reabilita Mini Hidroelétrika ne’ebé tinan barak la funsiona iha suku Gariuai, postu administrativu Baukau Vila.
Sekretáriu Estadu Eletrisidade, Bee no Saneamentu, Santos Noronha, esplika sistema estabelesimentu Mini Hidroelétrika ne’e apoia husi parseiru dezenvolvimentu no utiliza iha tinan 2009 maibé paradu totál hafoin avaria iha tinan 2013.
“Ha’u mai hamutuk ho ekipa atu haree no halo fali levantamentu dadus foun ba utilizasaun Mini Hidroelétrika. Bá-oin karik iha posibilidade utiliza mós ba fornesimentu bee-moos, la’ós de’it utiliza ba enérjia eletrisidade,” Sekretáriu Estadu ne’e hateten iha sede suku Gariuai, segunda ne’e.
Governante ne’e haktuir katak Mini Hidroelétrika ne’e avaria kauza husi sistema HVR (Heat recovery ventilation) iha sentrál hetan estragu, nune’e afeta bá fornesimentu enérjia eletrisidade ba komunidade iha Gariuai.
Iha biban ne’e, Xefe Suku Gariuai, Arlindo Freitas Belo hateten autoridade suku tinan barak halo ona esforsu liuhosi proposta ba Governu Sentrál atu fó atensaun ba problema referidu, maibé la tau iha konsiderasaun.
“Ami sente triste. Ha’u eleitu sai xefe suku iha 2017, hato’o proposta bá governante sira, maibé la tau konsiderasaun to’o ohin loron,” Arlindo haktuir.
Mini Hidroelétrika ne’e estabelese ho objetivu atu hamenus dependénsia enérjia eletrisidade husi jeradór diesel tanba hamosu enérjia únika husi estasaun hidroelétrika iha Timor-Leste.
Kustu konstrusaun ba Mini Hidroelétrika iha tinan 2005 hamutuk millaun $1.4 liuhusi Diresaun Rekursu Bee no Enérjia Noruega ne’ebé konstrui barajen terraplen rua hanesan iha área mota Builai no ida iha mota Wainalale ho distánsia kilómetru 2,2 ne’ebé fornese bee ba turbina jeradór kilowatt (kWh) 326, Pelton-type kapasidade kWh 326 no produsaun líkida anuál kWh 1.452,000.
Jornalista: Natalino Belo
Editór: Xisto Freitas da Piedade
