DILI, 26 Fevereiru 2025 (TATOLI)—Ministru Komérsiu no Indústria, Filipus Nino Pereira, partisipa retiru ekonomia The Association of Southeast Asian Nations (ASEAN) ba dala-31 iha Johor, Malázia.
Ministru Nino Pereira ho nia delegasaun bá partisipa iha retiru referidu hosi loron 26 to’o 28 Fevereiru 2025.
“Retiru ida-ne’e hanesan reuniaun estatutária ASEAN nian, akontese iha ámbitu esforsu boot Timor-Leste hala’o atu integra iha organizasaun rejionál sira,” haktuir komunikadu imprensa husi Ministériu Komérsiu no Indústria ne’ebé TATOLI asesu, kuarta ne’e.
Iha tinan 2025, Malázia mak ezerse funsaun hanesan Prezidente rotativu ASEAN, ho tema Inkluzividade no Sustentabilidade, no mós ho kompromisu atu haburas ekonomia ASEAN nian ne’ebé fó prioridade ba kreximentu inkluzivu, hodi garante katak Estadu membru hotu-hotu hetan benefísiu hosi prosperidade ne’ebé fahe. Iha tempu hanesan, Malázia hakarak atu hametin rejiaun nia reziliénsia hodi hasoru dezafiu globál sira.
Retiru ida-ne’e aprezenta oportunidade ida tan ba diálogu kona-ba inisiativa sira, inklui Prestasaun Ekonómika Prioritária ba 2025, no progresu ne’ebé atinje ona hosi integrasaun ekonómika, no hametin parseria ekonómika esterna sira ASEAN nian.
Ajenda espesífika ne’ebé sei diskute iha retiru ne’e mak hanesan, atualizasaun ba negosiasaun Akordu ASEAN ba bens (ATIGA), progressu Akordu Ekonomia Dijitál ASEAN (ASEAN DEFA), Integrasaun Timor-Leste ba ASEAN, prioridade Prezidénsia Malázia nian ba tinan 2025 no Planu Estratéjiku Pilár Ekonomia 2026-2030 ba Vizaun Komunidade ASEAN tinan 2045.
Iha ámbitu retiru ne’e, Ministru Nino Pereira mós sei realiza enkontru bilaterál ho Sekretáriu-Jerál ASEAN, Kao Kim Hourn, hodi fó hanoin ba malu kona-ba prosesu integrasaun Timor-Leste nian ba ASEAN, liuliu iha Pilár Ekonomia, no mós enkontru bilaterál ho Ministru Investimentu, Komérsiu no Indústria Malázia, Tengku Zafrul Tengku Abdul Aziz kona-ba Malázia nia prioridade hodi fó apoiu másimu ba Timor-Leste nia integrasaun ba tinan 2025.
Jornalista: Felicidade Ximenes
Editór: Xisto Freitas da Piedade
