BAUKAU, 27 Fevereiru 2025 (TATOLI)—Autoridade Protesaun Sivíl (APC-sigla portugés), kinta ne’e, hahú tesi ai (hali) nu’udár parte prevensaun dezastre iha Baukau Vila.
Komandante Operasionál APC Munisípiu Baukau, Francisco Viana Freitas, esplika desizaun tesi ai bazeia ba despaxu husi Ministériu Interiór hafoin simu pedidu husi Autoridade Administrasaun Munisipál ho razaun prevene dezastre inklui evita asidente tráfegu iha Baukau Vila.
“Ami apoia tesi ai ne’ebé identifikadu fó risku ba uma no transporte públiku liuliu iha tempu udan no anin-boot,” Komandante Opersionál APC informa ba TATOLI iha ninia kna’ar fatin.
Viana subliña hafoin simu oreintasaun, ekipa APC liuhosi korpu bombeiru diretamente ezekuta tesi ai-hún iha área sede suku Tirilolo ne’ebé hetan apoiu ekipamentu karreta elevadór no karreta opersionál rua inklui pesóal APC husi nasionál hamutuk na’in-13.
Tuir planu, ekipa sei kontinua tesi tan iha área Vila Antiga hanesan parte Sentru Saúde Baukau Vila, no iha área bairru Star Motór ne’ebé kategoriza risku ba uma no movimentasaun transporte.
Notísia relevante: Ai tohar iha Bahu rezulta uma estragu no taka dalan diresaun Baukau-Lautein
“Ita antesipa tohar no nia fuan halo namdoras hamosu asidente tráfegu,” Viana Freitas subliña.
Entretantu, iha Baukau Vila, kuaze estrada públiku diresaun Baukau bá Lautein no Vila Antiga to’o suku Uailili, maioria eziste hali-hún ne’ebé kuaze tinan barak ona fó risku ba uma abitante no movimentasaun transporte bainhira akontese udan no anin-boot.
Antes ne’e, 25 Fevereiru 2025, hali-hún tohar iha área Ro-ulo, suku Bahu, Postu Administrativu Baukau, kauza husi udan no rai-halai, rezulta uma abitante ida hetan estragu no taka dalan diresaun Baukau bá Lautein.
Tuir kronolojia, dezastre naturál ne’e akontese purvolta tuku14:30 Otl hafoin udan boot, iha-ne’ebé afeta ba rai halai hodi rezulta ai (hali) tohar no fó impaktu ba movimentasaun transporte diresaun Baukau bá Lautein no Lautein-Dili.
“Ai tohar tanba afeta husi udan boot akompaña anin rezulta taka dalan, uma ida no kioske ida hetan estragu,” Komandante Opersionál Autoridade Protesaun Sivíl (APC-sigla portugés), Francisco Viana Freitas hateten ba jornalista iha Vila Antiga, Baucau.
Jornalista: Natalino Belo
Editór: Xisto Freitas da Piedade
