DILI, 27 Fevereiru 2025 (TATOLI)—Ajénsia Invest People realiza semináriu kona-ba mudansa mentalidade ba joven na’in-20 husi universidade sira iha Dili laran ho objetivu atu muda mentalidade iha sosiedade nune’e bele iha hanoin pozitivu ne’ebé di’ak ba ema hotu.
“Semináriu ne’e nia objetivu atu hasa’e ema-nia mentalidade atu sai husi pasadu ida-ne’ebé mak nakonu ho todan barak, entaun presiza liberta aan husi ida-ne’e atubele hakotu hodi hatene ba futuru ho di’ak,” Diretora Ezekuitiva Invest People, Maria Carmen Babo Araújo dehan ba TATOLI iha JL WORD, Areia Branca, Kristu Rei, kinta ne’e.
Nia hateten husi semináriu ne’e bolu joven sira mai iha-ne’e hodi aprende maneira ida-ne’ebé atubele halo sai ema ne’ebé mak susesu iha sosiedade nia leet.
“Tanba ne’e presiza muda hanoin di’ak ba ita-nia aan tanba husi hanoin mak muda ita-nia aan sai kualidade ne’ebé mak di’ak iha sosiedade,” nia esplika.
Nia haktuir Timor-Leste sei iha mentalidade ki’ak kompara ho nasaun avansada sira, signifika TL mai ho mentalidade ne’ebé mak iha limitasaun, problema barak, entaun presiza hadi’a buat sira-ne’e ho di’ak.
Iha fatin hanesan, estudante husi Universidade Dili (UNDIL), Cristiano da Costa, dehan husi semináriu ida-ne’e di’ak oinsá atu muda ema-nia hanoin husi pasadu ba futuru.
“Mudansa mentalidade ne’e maihusi ita ema idak-idak nia aan hodi ultrapasa situasaun difísil ne’ebé mak iha, tanba estigmasaun sei nakonu iha sosiedade entaun ita na’in labele muda bainhira ita seidauk hetan informasaun di’ak sira ne’ebé mak iha,” Cristiano da Costa haktuir.
Nia afirma informasaun sira-ne’ebé simu iha-ne’e sei fahe mós ba ema seluk ne’ebé mak seidauk hetan informasaun sira kona-ba mudansa mentalidade ida-ne’e, oinsá atu muda joven sira-nia mentalidade ne’ebé mak sira hasoru iha pasadu.
Ajénsia Invest People nu’udár ajénsia foun ne’ebé halai liubá formasaun karater umana, jestaun, étika serbisu no seluk-seluk tan.
Jornalista: Felicidade Ximenes
Editór: Xisto Freitas da Piedade
