DILI, 27 Fevereiru 2025 (TATOLI)—Sekretaria Estadu Formasaun Profisionál no Empregu (SEFOPE), kinta ne’e, entrega mate-isin traballadór Ariano Frenquy Lemos de Deus, ne’ebé mate iha Tasmánia, Austrália, bá família iha Aeroportu Internasionál Prezidente Nicolau Lobato, Komoro, Dili.
Matebian Ariano Frenquy de Deus Lima nia mate-isin to’o iha aeroportu ho aviaun Qantas iha tuku 14:10 Otl, ne’ebé simu husi Governu ho família, no sei haloot iha nia rai moris fatin.
Xefe Gabinete SEFOPE, Jacinto Ribeiro Dias, dehan matebian Ariano nia mate la’ós afeta de’it ba família, maibé ba mós nasaun, tanba sira-ne’ebé mak serbisu iha Austrália hanesan rikusoin Timor nian, iha-ne’ebé nu’udár eroi ekonomia ba família no eroi ekonomia ba nasaun.
“SEFOPE enkoraja família katak tenke simu realidade sira-ne’ebé mak iha, tanba ikusmai fó sentimentu triste ba ita. Tanba ne’e, esforsu husi ami mak ita haruka bá Austrália maibé ikus lori triste mai ita,” Jacinto dehan ho triste.
Iha biban ne’e, Constantino Magno nu’udár família matebian agradese ba Governu liuhusi SEFOPE ne’ebé fasilita ona prosesu ida-ne’e, ne’ebé ohin loron matebian to’o Timor-Leste.
“Ami família agradese ba Governu tanba atende ona matebian liuhusi prosesu naruk, mak ohin loron matebian bele to’o iha ita-nia rai,” nia agradese.
Entretantu, matebian Ariano moris iha Cavalima, loron 6 Abríl 1986. Traballadór ne’e hakotu iis iha loron 02 Fevereiru 2025, maizumenus tuku 02:00 madrugada oras Austrália, iha haris-fatin, Tasmánia, Austrália. Matebian oan husi António de Deus Lima no inan Agostinha Seuk Clau no matebian iha alin na’in neen.
Matebian ramata nia estudu nivel sekundária iha eskola públika Seran Cotec Suai, Covalima, iha tinan 2007, no kontinua nia estudu iha Ensinu Superiór UNTL, iha Fakuldade Ekonomia to’o livre teoria. Matebian aplika vaga Austrália iha tinan 2019 ho rezultadu admitidu.
Iha Outubru 2023, matebian hetan kontratu servisu husi empregadór Tasmania Berries. Iha loron 25 Outubru 2023, matebian dezloka bá servisu iha Austrália no fila iha loron 30 Abríl 2024. Nune’e, matebian kontinua hetan fiar husi empregadór hodi bá servisu iha loron 28 Setembru 2024 durante fulan sia.
Matebian hanesan trabalhadór ida-ne’ebé komportamentu di’ak, onestu no kumpri regra. Tanba ne’e, empregadór kontinua fó konfiansa hodi servisu iha Austrália. Maibé, iha domingu, loron 02 Fevereiru 2025, simu novidade triste husi adidu Austrália katak matebian hakotu nia vida iha nia hela fatin.
Jornalista: Felicidade Ximenes
Editór: Xisto Freitas da Piedade
