BAUKAU, 04 Marsu 2025 (TATOLI)—Hetan ona mate-isin Mateus da Costa (80) iha tersa ne’e ho kondisaun dezmembrada (separa) iha área Maubai, aldeia Ono-sere, suku Buruma, postu administrativu Baukau Vila.
Xefi suku Buruma, Libório dos Santos Freitas esplika sidadaun referida deskonfiada mate kuaze semana ida resin ona, nune’e família buka tuir ikusmai hetan ho kondisaun dezmembrada tanba isin haketak ho ulun, liman no ruin.
“Kondisaun vítima dezmembrada tanba ulun, liman no ain haketak ona husi isin,” Xefi suku Buruma informa ba TATOLI liuhosi telefónema, tersa ne’e.
Sidadaun referida moris iha suku Samalari, postu administrativu Laga, Baucau, estatutu solteiru, hela iha aldeia Ono-sere, suku Buruma, kategoriza ema ho moras mentál ne’ebé durante tinan barak hela mesak.
Libório Freitas haktuir katak informasaun dahuluk ne’ebé rekollida, família buka tuir no konsege hetan iha natar laran no atualmente seidauk bele fó-sai kauza husi vítima lakon vida maibé Komandu Polísia Nasionál Timor-Leste (PNTL) munisípiu Baukau liuhosi Departamentu Investigasaun Kriminál (DIK) halo ona identifikasaun no tuir planu sei kontinua halo autópsia iha Ospitál Nasionál Guido Valadares (HNGV-sigla portugés).
“Família deside entrega ba polísia atu kontinua halo autópsia nune’e bele hatene loloos kauza husi akontesimentu ne’e,” Libório Freitas akresenta.
Libório husu ba komunidade iha Buruma atu iha futuru kuida aan inklui fó atensaun másima ba kada membru família ne’ebé kategoria idozu, liuliu kondisaun ema ho moras mentál nune’e evita mosu kazu hanesan ne’e.
Jornalista: Natalino Belo
Editór: Xisto Freitas da Piedade
