BAUKAU, 04 Marsu 2025 (TATOLI) —Vítima inisiál MdS, tersa ne’e, hakotu vida rasik liuhosi dalan tara-aan bainhira ho kondisaun lanu iha Bairu Rakalele, Vila Nova, postu Baukau vila.
Tuir kronolojia, vítima tama uma iha madrugada purvolta tuku 05:00 Otl ho kondisaun lanu, nune’e kria barullu no mezmu família inklui kolega sira hadeer hodi satan maibe la konsege salva Mds nia vida tanba hetan atake hosi vítima rasik.
Aman husi vítima, Luís dos Santos Pereira esplika bainhira feen kaben fanun, hadeer haree vítima lori tali halai bá-mai no konsege atu tara aan maibe hetan salva husi aman. Maski nune’e, vítima kontinua halo asaun hasoru ikusmai lakon vida husi tara aan.
“Ha’u hamutuk ho nia alin inklui ninia kolega koko salva maibé nia (vítima) kontra hasoru nune’e bainhira informa bá polísia no kuandu polísia to’o iha uma, vítima hakotu ona iis (mate),” aman vítima, Luís dos Santos Pereira hateten iha Vila Nova.
Luís Pereira haktuir matebian antes sai husi uma laiha indikasaun ruma atu hakotu vida maibé bainhira ramata konsumi álkol mosu insiativa no ikusmai tara-aan iha kuartu laran.
“Ami rua nia inan fila husi dalan bainhira informa bá Polísia, to’o mai uma tara aan mate ona,” Luís Pereira akresenta.
Entretantu, Komandu Polísia Nasionál Timor-Leste (PNTL) Munisípiu Baukau halo ona identifikasaun ba kazu referidu no sei koordena entre família hodi deside halo autópsia no halo tuir lisan ka kultura molok haloot.
Vítima Mds, sexu mane, idade 22, nu’udár universitáriu, husi aldeia Buile, suku Bahu, postu administrativu Baukau Vila.
Jornalista : Natalino Belo
Editór : Xisto Freitas da Piedade
