DILI, 05 Marsu 2025 (TATOLI) – Ministériu Agrikultura Pekuária, Peska no Floresta (MAPPF), liuhusi Diresaun Nasionál Konservasaun Floresta no Dezenvolvimentu Ekoturizmu rejista espésie manu no ai-horis oioin iha Parke Nasionál Nino Konis Santana, iha munisípiu Lautein.
Diretór Nasionál Konservasaun Floresta no Dezenvolvimentu Ekoturizmu, Pedro Pinto, informa katak kooperasaun ho BirdLife International hodi halo peskiza iha Parke Nasionál Nino Konis Santana hodi identifika espésie manu 262, no husi númeru ne’e 19 tama iha risku ba estinsaun.
Aleinde ne’e, ba kooperasaun ho Governu Norte Territóriu Austrália nian identifika espésie ai-horis nativa hamutuk 2.500, ai-horis foun sanulu, ameasa ba estinsaun hamutuk 1.713, endémika 26 no vejetativu 12.
Liuhusi kooperasaun ho Organizasaun Internasionál ba Konservasaun identifika mós espésie korál 400, husi ne’e 88 amesadu atu lakon.
Kona-ba ikan tasi rejista espésie 1.232, iha ne’ebé hitu ameasadu lakon no endémiku ida. Nune’e mós identifika tipu reptíl lima ne’ebé besik atu lakon no espésie niki 35.
Parke Nasionál Nino Konis Santana ho nia luan hamutuk ektare rihun 170, iha ne’ebé 40% tasi no 60% rai-maran.
Lembra katak Governu Timor-Leste sei rejista Parke Nasionál Nino Konis Santa hanesan rezeva biosfera iha ámbitu Programa Man and Biosphere (MAB) Organizasaun Nasaun Unida ba Edukasaun, Siénsia no Kultura (UNESCO) iha Paris, ho objetivu atu hadi’ak parke nia estadu konservasaun no insentiva envolvimentu komunidade iha salvaguadra biodiversidade nian.
Notísia relevante: Timor-Leste sei aprezenta Parke Nasionál Nino Konis Santana hanesan Patrimóniu Mundiál
Jornalista: Arminda Fonseca
Editora: Maria Auxiliadora
