DILI, 06 Marsu 2025 (TATOLI)–Vise Prezidente Komisaun D iha Parlamentu Nasionál (PN) ne’ebé trata asuntu Ekonomia no Dezenvolvimentu, Manuel Henrique Noronha, husu ba Autoridade Inspesaun Fiskalizasaun Ekonóma n Sanitária, Institutu Públiku (AIFAESA, I.P) atu fó sansaun rigór ba loja ne’ebé fa’an sasán liu prazu.
“Presiza fó sansaun rigorozu ba sira para labele halo tan, tanba ita bele hateten hanesan ne’e, loja fa’an sasán buka keuntungan, maibé se keuntungan ida mak fó impaktu komunidade nia saúde ne’e labele,” Deputadu hateten iha resintu PN, kinta ne’e.
Deputadu Bankada Governu husi Partidu Demokrátku (PD) ne’e apresia ho servisu AIFAESA durante ne’e ne’ebé hahú halo inspesaun iha fatin-fatin hodi kontrola operadór ekonómiku sira.
Notísia relevante : AIFAESA halo inspesaun ba empreza iha Dili, maioria foos no masin-midar estragadu
Iha sorin seluk, Prezidente Komisaun F ne’ebé trata asuntu Saúde, Igualidade Jéneru no Inkluzaun Sosiál, Maria Gorumali Barreto, dehan bainhira loja sira kontinua fa’an sasán liu prazu ne’e fó impaktu ba ema nia saúde, nune’e presiza foti sansaun rigór atu labele kontinua fa’an sasán liu prazu no bainhira identifika bele prosesa tuir lei.
Nune’e, Deputada Bankada Governu husi Kongresu Nasionál Rekonstrusaun Timorense (CNRT) husu AIFAESA atu kontinua hala’o servisu kontrola no inspesaun rutina ba estabelesimentu operadór ekonómiku hodi garante kualidade produtu ba konsumidór sira.
Iha loron semana ikus ne’e, ekipa husi AIFAESA konsege identifika produtu kaduka no estragadu iha empreza Amor de Familia Mart ne’ebé lokaliza iha área Surik Mas. Produtu hirak ne’e hanesan ikan teri hamutuk kaixa 506, foos saka 2937, no produtu misturadu sira seluk hamutuk 765.
Nune’e mós, iha loron tuir mai, bainhira ekipa halo servisu kontrolu ba estabelesimentu komersiál iha kapital Dili, postu administrativu Nain-Feto, halo inspesaun ba estabelesimentu komersiál Paramitha ne’ebé halo produsaun ba dosi, identifika empreza utiliza produtu expiradu hodi halo produsaun ba dosi. Iha okaziaun ne’e inspetór responsável ho ekipa halo apreensaun ba produtu hirak ne’e hodi halo prosesu ba responsável sira.
Aleinde ne’e, ekipa konjunta lidera husi AIFAESA kontinua halo kontrolu ba fatin produsaun bebidas no hetan produtu expiradu iha Empreza Suhurama, iha loron 04 Marsu 2025. Iha atividade ne’e, ekipa operasionál detekta produtu expiradu ho marka ‘Highly Concentrated Kefir Fermentation Liquid’ ho nia kuantiade masa 59.
Iha loron tuir mai, Ekipa intervensaun rápida halo kontrolu másimu iha loja Family First Supermarket, iha áraa Hudi laran, konsege detekta produtu alimentár ne’ebé liu ona prazu hamutuk kaixa lima estragadu, plástiku 35, no falta rekizitus neen . Ho ida ne’e ekipa rekolla produtu referidu hodi prosesa tuir lei ne’ebé iha . Alende ne’e ekipa AIFAESA fó atensaun loja na’in hosi kontrola nafatin produtu sira molok komersializa.
Jornalista : Nelson de Sousa
Editora : Julia Chatarina
