DILI, 07 Marsu 2025 (TATOLI) – Núnsiu Apostóliku Vatikanu iha Timor-Leste, Monsénor Marco Sprizzi, vizita komunidade musulmana iha Meskita An-Nur iha Kampung Alor, Dili, hodi lori mensajen Santu Padre nian.
Monsénor Marco Sprizzi hateten vizita ida-ne’e hola parte nu’udar atividade dahikus nian iha nia misaun nia rohan iha Timor-Leste.
Nia dehan iha fulan ramadaun, Santu Padre dirije mensajen ida ba musulmanu hotu, tanba ne’e nia bá entrega mensajen Papa nian ba líder no komunidade musulmana iha Timor-Leste.
“Ida-ne’e mak komunidade ezemplár ida iha sentidu fraternidade nian ho ita no ho relijiaun hotu atu konstrui pás no armonia sosiál. Papa dirije mensajen ida-ne’e atu enkoraja sarani sira hotu husi relijiaun hotu-hotu, liuliu musulmanu no katóliku sira hamutuk atu kria dame no armonia”, Marco Sprizzi hateten iha Meskita An-Nur, ohin.
Iha mensajen ne’e, Papa Francisco hato’o mós parabéns no ksolok ramadaun nian ba komunidade musulmana hotu. “Momentu ida-ne’e mak momentu ida ne’ebé evidente, nabilan husi ita-nia fraternidade no ita kontinua”, dehan.
Mesajen Papa Francisco iha fulan ramadaun ba musulmanu sira
Amu Papa nia mesajen ba komunidade musulmana mak iha inísiu fulan ramadaun nian, dikastériu ba dialógu interelijiozu hato’o saudasaun no amizade. Tempu halo jejúm, orasaun no karitativa maka oportunidade di’ak tebes atu hakbesik liután ba Maromak no hafoun aan iha valór fundamentál sira iha relijiaun idaidak nian valór kompaixaun no solidariedade nian.
Tinan ida-ne’e, tempu ramadaun koinside ho tempu kuarezma, ne’ebé ba sarani kristaun sira maka tempu mós halo jejúm, hakribit sala no konversaun ba Kristu. Ho selebrasaun besik malu ida-ne’e iha kalendáriu espirituál nian nakloke mai hotuhotu oportunidade inisiada atu la’o hamutuk, sarani kristaun no musulmanu, iha prosesu komúm ba purifikasaun, orasaun no karidade nian.
“Ba ami katóliku sira, ami haksolok atu fahe tempu ho imi tanba ida-ne’e fó hanoin mai ami katak ita hotu maka peregrinu iha rai ida-ne’e, no katak ita hotu buka atu moris di’ak liután, liuliu kona-ba saida maka ita hakarak sai hamutuk, nu’udar sarani no musulmanu, iha mundu ida ne’ebé buka esperansa”.
Mensajen husi Papa katak iha fulan ida-ne’e hakarak sai maluk di’ak iha serbisu de’it ba mundu ida di’ak liu ka, sai maun-alin loloos hodi fó sasin ba Maromak nia amizade ba umanidade tomak.
“Liu fali nu’udar fulan jejún nian, ramadaun mosu ba ami katóliku sira hanesan eskola ida hodi hanorin ami transformasaun interiór nian. Hodi hadook-aan hosi hahán no hemu, musulmanu sira hatoman aan atu kontrola sira-nia hakarak no fila ba saida maka esensiál. Tempu disiplina espirituál ida-ne’e konvida ita atu haburas piedade, virtude ne’ebé hakbesik ba Maromak hodi loke fuan ba ema seluk”, dehan.
Nia dehan hanesan hotu-hotu hatene katak iha tradisaun sarani kristaun, tempu santa kuarezma nian konvida kristaun no musulmanu atu tuir dalan ne’ebé hanesan liuhusi jejún, orasaun no fó ezmola no tau fali foku ba ida ne’ebé sai matadalan no dirije moris ida-ne’e.
“Prátika espirituál sira-ne’e, maski espresa ho maneira ne’ebé diferente, maibé fó hanoin mai ita katak fiar la’ós de’it kona-ba espresaun esterna sira, maibé tenke sai dalan ida ba konversaun interiór iha mundu ida ne’ebé markadu ho injustisa, konflitu no inserteza kona-ba futuru ita-nia vokasaun komún bolu ita ba buat barak iha fali prátika espirituál sira ne’ebé atu hanesan”, nia subliña.
Nia haktuir mundu hamrook ba fraternidade no diálogu loloos hamutuk, musulmanu no sarani kristaun bele fó sasin ba esperansa ida-ne’e, iha konviksaun katak amizade ne’e posivel maski iha istória ne’ebé todan no ideolojia sira-nia ne’ebé promove ekskluzaun.
Hodi salienta katak konfiansa iha Maromak mak rikusoin ida ne’ebé halibur malu, hodi ultrapasa diferensa sira. Nia fó hanoin mai ema katak ema hotu mak kriatura espirituál, ho isin ema nian, no Maromak hadomi, bolu atu moris iha dignidade no respeitu ba malu.
“Liután ida ne’e, ami hakarak sai guarda ba dignidade sagradu ida-ne’e hodi rejeita violénsia iha forma hothotu, diskriminasaun no eksluzaun nian. Tinan ida-ne’e, bainhira ita-nia tradisaun espirituál rua konverje hodi selebra ramadaun no kuarezma, ita iha oportunidade únika ida atu hatudu ba mundu tomak katak fiar transforma ema no sosiedade sira, no katak ida-ne’e maka forsa ida ba unidade no rekonsiliasaun”.
Iha mundu ida ne’ebé “tentasaun sira atu harii kultura muru nian, atu hasa’e muru sira, hanesan muru sira iha fuan, muru sira ne’e bele impede enkontru ho kultura sira seluk, ho ema sira seluk” mosu fila-fali (Papa Francisco, Fratelli Tutti, 27), “ita-nia dezafiu mak harii, liuhusi diálogu, futuru komún ida ne’ebé harii iha fraternidade”.
“Ita lakohi atu moris ketak-ketak de’it, ita hakarak moris hamutuk iha estima mútua sinseru. Valór sira ne’ebé ita bele partilla, hanesan justisa, kompaixaun no respeitu ba kriasaun, tenke inspira ita-nia asaun no relasaun sira, no sai hanesan ita-nia matadalan hodi harii ponte sira ein vez de muru sira, defende justisa ein vez de haterus ema, proteje ambiente ein vez de estraga nia. Ita-nia fiar no ninia valór sira tenke tulun ita atu sai lian sira ne’ebé ko’alia hasoru injustisa no indiferensa, no haklaken beleza husi diversidade umana”, realsa.
Iha tempu ramadaun ida-ne’e no “to’o besik loron Idul-Fitri, sarani katólika kontente atu fahe esperansa ida-ne’e ho ita-boot sira. Atu ami-nia orasaun sira, ami-nia jestu sira solidariedade nian no ami-nia esforsu sira ba dame no husi ami-nia amizade sinseru ho ita-boot. Atu festa ida-ne’e sai okaziaun ba enkontru fraternu sira entre musulmanu no sarani kristaun sira, iha-ne’ebé bele selebra hamutuk Maromak nia laran-diak”.
Ikus, Papa dehan momentu sira fahe nian ne’ebé simples, maibé kle’an hanesan ne’e maka fini esperansa nian ne’ebé bele transforma komunidade sira no mundu. “Atu ita-nia amizade sai anin fresku ba mundu ida ne’ebé hamrook ba dame no fraternidade”, konklui.
Jornalista: Arminda Fonseca
Editora: Maria Auxiliadora
