KOVALIMA, 12 Marsu 2025 (TATOLI) – Servisu munisipál jestaun merkadu no turizmu, kuarta ne’e, sosializa regra, rejimentu estabelesementu ba negosiante sira, iha merkadu Debos, Postu administrativu Suai, Munisípiu Kovalima.
Xefe departamentu jestaun merkadu no turizmu, Mariano Lopes, esplika, bazeia ba baze legál; Rejimentu ba establesimentu merkadu númeru 005 / GM / MCIA X /2014 ho nia definisaun katak merkadu mak fatin públiku no fatin hasoru malu entre ema ne’ebé maka fa’an no sosa ka troka sasan ka prestasaun servisu ruma.
“Atividade sosializasaun hanesan atividade anuál ne’ebé tau iha Planu asaun anuál 2025. Ita sosializa rejimentu estabelesementu ba negosiante sira iha merkadu Debos”, Mariano Lopes dehan ba jornalista sira iha merkadu Debos, ohin.
Xefe turizmu ne’e dehan, atividade sosializasaun ba rejimentu estabelesementu ne’e mak hanesan direitu atu uza propriedade Estadu iha merkadu, dever uza propriedade Estadu iha merkadu no bandu atu fa’an sasan retallu (grosir) no seluktan.
Direitu kona-ba uza propriedade Estadu iha merkadu hanesan povu hotu iha direitu atu uza merkadu tuir kapasidade no nesesidade bazeia ba regra Estadu nian, iha mós direitu atu loke loja, restaurante, kioske no uza fasilidade bazeia ba regra Estadu.
Dever kona-ba uza propriedade Estadu iha merkadu mak hanesan halo tuir orientasaun Estadu nian ne’ebe hatuur ona iha Dekretu Lei no Rejimentu, selu arrendamentu tuir Diploma no Rejimentu sira haruka, selu taxa retribuisaun tuir Diploma no Rejimentu sira haruka no loja, restaurante, kioske, no fa’an produtu lokál permanente sira presiza prepara fatin lixu iha ida-idak nia fatin, molok atu ba so’e iha fatin lixu públiku.
Ba fa’an-na’in produtu lokál sira ne’ebé la’ós permanente, mai husi uma lori produtu, molok atu fila lori fo’er ba tau hela iha fatin lixu públiku ne’ebé prepara ona.
Aleinde ne’e, bandu fa’an sasan grosu iha merkadu hodi halo engarafamentu ba transporte no movimentu ema nian, labele para karreta Trek, Anguna no Mikrolete iha merkadu kotuk hahú tuku 07:00 dadeer to’o 06:30 hodi hatuun no hasa’e sasan; bainhira la kumpri sei taka totál odamatan sira ne’ebé na’in konstrui.
Iha sorin seluk, Negosiante merkadu Debos, Paulino Ferreira, prontu atu kumpri regra ne’ebé fó sai husi Jestaun merkadu no turizmu maibé presiza iha seguransa no halo jestaun ba merkadu; tenke kontrola ho di’ak.
“Ami hatene merkadu la’ós fatin atu toba maibé presiza iha seguransa atu kontrola merkadu tanba naok-teen sira la’ós ida rua de’it, ha’u mós sai vítima kala-kalan ema hemu tua iha ne’e la iha seguransa entaun ami tenki toba hodi hein ami-nia sasan”, nia informa.
Negosiante ne’e mós fó hanoin, halo jestaun presiza atu kontrola di’ak tanba lei la iha ba Xina sira ne’ebé fa’an modo-tahan, nesesidade bázika no materiál konstrusaun, maibé tanba sa mak timoroan labele fa’an bua-malus no sapatu.
Realidade hatudu sidadaun husi estranjeiru bele fa’an sasan saida de’it iha merkadu maibé tanbasá tenke fó limitasaun nune’e timoroan labele fa’an.
Jornalista: Celestina Teles
Editór: Rafael Ximenes de A. Belo
