BAUKAU, 13 Marsu 2025 (TATOLI)—Autoridade suku Kaibada Uaimua, postu administrativu Baukau Vila, sei reabilita estrada no irrigasaun iha aldeia Uani-uma liuhosi Programa Nasionál Dezenvolvimentu Suku (PNDS).
Xefi suku Kaibada Uaimua, Cosme da Costa Lopes, esplika autoridade suku liuhosi reuniaun konsellu suku deside konsesu hodi implementa atividade regulár síklu VII tinan-2025 tanba bazeia ba kondisaun estrada inklui hadi’a irrigasaun nune’e bele reativa hikas natar komunidade iha aldeia referida.
“Ita aprezenta ona planu atividade regulár síklu VII ba PNDS munisípiu no hein orsamentu atu implementa,” Xefi suku Kaibada Uaimua informa ba TATOLI iha sede suku Kaibada, Baukau, tersa (11/03).
Cosme Lopes salienta katak ekipa téknika PNDS hamutuk ho autoridade suku finaliza ona levantamentu dadus kona-ba estrada ho totál kilómetru ida-ne’ebé tuir planu sei ateru no cor iha subida.
Enkuantu, sei reabilita mós irrigasaun tanba sei fasilita bee ba natar ho totál ektare 40 ne’ebé konsideradu abandonadu tinan barak ona no bainhira funsiona bele motiva komunidade atu hala’o vida nu’udár agrikultór iha Kaibada.
“Orsamentu seidauk alokadu. Bainhira atividade regulár síklu VI finalizadu ona mak aloka orsamentu,” Cosme Lopes tenik.
Suku Kaibada Uaimua hamutuk aldeia tolu kompostu husi Ana-uaru, Uani-uma, Hau-robu ho totál populasaun hamutuk rihun tolu-resin no uma-kain 600-resin.
Jornalista: Natalino Belo
Editór: Xisto Freitas da Piedade
