BAUKAU, 14 Marsu 2025 (TATOLI)—Komunidade suku hamutuk uma-kain 50 kompostu husi Suku Kaibada Uaimua no Bahú, Postu Administrativu Baukau Vila, sai alvu ba levantamentu rai hosi Diresaun Terra no Propriedade (DTP) Munisípiu Baukau.
Xefi Suku Kaibada Uaimua, Cosme da Costa Lopes, hato’o agradesementu ba Governu liuhosi Sekretaria Estadu Terra no Propriedade ne’ebé deside Suku Kaibada nu’udár alvu ba implementasaun levantamentu rai nune’e futuru komunidade iha ona sertifikadu rai tanba sai patrimóniu privadu.
“Ita hetan previléjiu ba implementasaun dahuluk iha Baukau. Daudaun ne’e ekipa sira husi nasionál ho munisípiu hala’o hela levantamentu no bainhira finalizadu sei atribui sertifikadu ba komunidade,” Xefi Suku Kaibada Uaimua informa ba TATOLI iha nia kna’ar fatin, tersa (11/03).
Cosme Lopes informa komunidade iha Kaibada kontente tanba programa ne’e fó benefísiu no futuru bele prevene kazu disputa rai entre komunidade no atribuisaun sertifikadu ne’e mós sai rekursu hodi asesu finanseiru husi banku.
“Ida-ne’e faze dahuluk. Futuru ita bele hato’o pedidu ba Terra no Propriedade hodi kontinua ba faze daruak,” nia hatutan.
Antes ne’e, Diresaun Terra no Propriedade halo levantamentu no publika ona dokumentu relasiona ho rai iha tinan 2019 maibé atualmente kontinua halo levantamentu hodi fortifika dadus hotu nune’e bainhira atribui sertifikadu rai labele mosu dezentendimentu iha komunidade.
Prosesu levantamentu rai ne’ebé iha Baukau, hala’o iha aldeia Ana-uaru, Suku Kaibada Uaimua hamutuk uma-kain 48 no uma-kain rua seluk husi Aldeia Builé, Suku Bahú.
Entretantu, Sekretáriu Estadu Terra no Propriedade, Jaime Xavier Lopes, hamutuk ho ekipa hala’o ona enkontru ho komunidade Suku Bahú no Suku Caibada hodi esplika kona-ba prosesu atribuisaun sertifikadu relasiona ho direitu ba propriedade.
Jornalista: Natalino Belo
Editór: Xisto Freitas da Piedade
