DILI, 14 Marsu 2025 (TATOLI)—Sentru Agríkola Quinta Shalom Farm daudaun ne’e halo hela investimentu integradu ba komunidade rurál ne’ebé hakiak fini animál hanesan ikan lele, palapatia, nia no seluk tan.
“Daudaun ne’e, investimentu ne’ebé kompañia Shalom Farm hetan husi fini ne’e mak osan besik millaun $4, maibé nafatin presiza Governu nia apoiu hodi promove di’ak liután setór agrikultura iha Timor-Leste no kontinua halo investimentu integradu ba komunidade rurál ne’ebé hakiak fini. Kompañia halo mós kontribuisaun animál ba Igreja sira,” Jestór kompañia Shalom Farm, Ayub Joseph Karimi, informa iha resintu Shalom Farm, Hera, sesta ne’e.
Notísia relevante : MAPPF distribui fini animál ba grupu 200 iha territóriu nasionál
Shalom farm nu’udar kompañia sentru agríkola ne’ebé harii husi inisiativa ema estranjeiru hodi halo investimentu integradu ba komunidade iha área rurál liuhusi hakiak fini animál.
Empreza ne’e importa no prodús fini animál hodi fasilita komunidade bele investe, liuliu iha ikan-oan.
“Agora ha’u hakiak fini barak hodi bele fasilita komunidade Timor-Leste, liuliu iha área rurál no ha’u fa’an ba munisípiu hotu. Tinan kotuk ema mai sosa fini ikan oan iha ha’u hamutuk 1.800, ema sosa mínimu liu mak 1.200. Ha’u halo importasaun karau, bibi, manu-rade husi Índia, Iran no Turki,” nia akresenta.
Shalom farm mós fó oportunidade serbisu iha área agrikultura, ne’ebé maioria ema ne’ebé serbisu mesak timoroan.
“Daudaun ne’e traballadór iha Shalom Farm Hera hamutuk na’in-28, kompañia mós harii sukursál iha munisípiu seluk, ne’ebé totál ema ne’ebé serbisu iha kompañia hamutuk 120,” Jestór kompañia haktuir.
Nia dehan, sistema investimentu ne’ebé Shalom Farm halo mak hanesan fa’an fini ba komunidade sosa no hakiak halo boot, hafoin kompañia sosa fali hodi mai kontinua halo fali fini.
Shalom Farm eziste iha tinan 2019 no hahú operasaun iha tinan 2020, maibé konsege hapara operasaun provizóriu tanba kondisaun udan boot no COVID-19 momentu ne’ebá.
“Entaun laiha forsa, maibé konsege la’o fali no halo inaugurasaun iha tinan 2023 no hetan fundu husi Nova Zelándia no USAID, implementa husi WorldFish no CGIAR, halo parseria ho Governu,” nia akresenta.
Jornalista : Alexandra da Costa
Editora : Julia Chatarina
